Ungasianit kiassaaneq sunaava?

Ungasianit kiassarneq tassaavoq kiassaariaaseq sumiiffimmik imermik kissartumik pilersuineq,  inissianik kiassaanermut aamma taakkunani imermik kiattumut atorneqartartumut atorneqartarpoq. Ungasianitkiassarneq kiassaateqarfimmi  tunisassiarineqartarpoq imaluunniit innaallagissiorfimmi kiassaateqarfiutigisumi imaluunniit eqqakkanik ikuallaavimmi.

Kiassaaneq qanoq suliarisarparput?
Kiassarnermik pilersueriaatsitsinni qitiupput kiassaateqarfik aamma innaallagissiorfik kiassaateqarfiutigisoq. Kiassaateqarfinni aamma innaallagissiorfinni kiassaateqarfiutigisuni nukissiuummik pissarsiniarluni uulia ikumatinneqartarpoq. Assigiinngissutigaa, kiassaateqarfimmi uulia ikumatinneqartarpoq erngup kiassaanermut atugassap kissarsuutini uuliatortuni kissatsinneqarnissaa kisiat  siunertariinnarlugu.
Innaallagissiorfimmi kiassaateqarfiutigisumi uulia ikumatinneqartarpoq motoorini disel-imik ingerlatilinni innaallagissamik tunisassiorniarluni. Motoorit dieselitortut imermik nillusaammik nillorsimatinneqartarput, imerlu nillusaataasartoq erngup ungasianit kiassaataasup uunnaaneranut atorneqartarpoq.

Qaqortumi, Nuummi, Maniitsumi, Sisimiuni aamma Ilulissani kommunip eqqakkanik ikuallaavianit kissarneq sinneruttoq kiassarnermut aamma atorneqartarpoq.

Sumiiffinni innaallagissamik erngup nukinganik nukissiorfinnit tunisassiorfiusuni kiassaateqarfinni imeq ungasianit kiassarnermut atorneqartartoq elektrokedelini uunnanneqartarpoq. Sumiiffinni taakkunani aammattaaq periarfissaavoq kiassarnermik qaminneqarsinnaasumik imaluunniit aalajangersimasumik peqarnissaq.

Kiassaaneq qanoq suliarineqartarpa?
Kiassarneq suliarineqareeraangat ruujorit kiffiusersukkat aqqutigalugit imertut kissartutut sullitanut ingerlatinneqartarpoq; ruujori ataaseq siumut ingerlatitsisartoq, allalu kingumut ingerlatitsisartoq. Periutsimi tassani nukissap 2-10 %-ia maangaannartarpoq.

Illuni tamani kiassarnermik pissarsisartuni kiammik immikkoortiterisartumik ikkussisoqartarpoq, kissarneq attavitsigut ingerlasoq illup kiassaateqarfianut erngullu kissartup aqqutaatigut ingerlateqqinneqartarluni.
Kissarnerlu ingerlatinneqartarpoq imeq kissarnerup aqqutaaneersoq imerlu illup aqqutaaneersoq imminnut akulerutsinnagit.

Kiassaaneq qanoq annertutigisoq tunisarparput?
Ukiut tamaasa kiassarneq 190 million kWh (kilowatt-tiimit) angullugu tunisarparput. Tunisassioriaatsit sisamat; kissarsuutit uuliatortut atorlugit kiassarneq tunisassiarineqartoq, innaallagissamik tunisassiornermi kissarneq sinneruttoq, eqqakkanik ikuallaavinni kiak sinneruttoq tunisassiarineqartoq, kiassarneq elektrokedelinit tunisassiarineqartoq aamma kiassarneq innaallagissameersoq, annertussusiisa katinnerini assigiingajalluinnartumik annertussuseqarput.
Kiassarneq kommunit eqqakkanik ikuallaaviineersoq 2007-imi 24,4 million kWh-it missaanniippoq.

Inoqutigiit kiassaaneq qanoq annertutigisoq atortarpaat?
Inoqutigiit tamakkinngivillutik kiassarnermik uagutsinnit pisisarput, taamaammat innuttaasut tamaasa eqqarsaatigalugit agguaqatigiissitsinermik kisitsisaateqanngilagut. Ataatsimulli isigalugu oqartoqarsinnaavoq inoqutigiit ataatsit innaallagissamik atuinermut naleqqiullugu kiassarnermut annertunerujussuarmik atuisartut. Silaannaap nillernera tamatumunnga peqqutaavoq.

Illut qanoq sananeqarsimanerat aamma inuit illutik qanoq kiassaateqartinneraat annertuumik assigiinngissuteqarmata aammattaaq qanoq kiassaanermik naleqqussaasarnerat pissutigalugit, oqaatigiuminaatsorujussuuvoq inissiap 80 m2-inik angissusillip ukiumut kiassarneqarnera qanoq akeqarnersoq.

Kiassaaneq qanoq akeqarpa?
Kiassarneq sumiinneq apeqqutaalluni MWh ataatsimut 550-620 koruuninik akeqarpoq.
Ungasianit kiassarneq pillugu annertunerusumik atuarit uani.