Uummannami imeq imerneqartussaq pillugu killiffik

Ummannami imeq imeqarfimmeersoq suli imertut imeqarsinnaasutut akuerineqarsinnaanngilaq. Aalisakkanik suliffissuaqarfiit suli ajunngitsumik oqaloqatigineqarput.

Nutaarsiassaq nuannersoq Uummannami imeqarfiup akuerineqarsimanera ajoraluartumik utertinneqartariaqarpoq.

 

Ullumikkut misiliinerit tunngavigalugu avatangiisinut oqartussaasut ilisimatitsipput imeq imeqarfimmeersoq, imertut imerneqartussatut akuerineqarsinnaajunnaartoq.

Nukissiorfiit aalisakkanik suliffissuit pisoq nutaaq pillugu oqaloqatigai aamma aaqqiissutissamik nutaamik sulissuteqarput.

 

Taamaattorli innuttaasut allannguuteqarneq malugissanngilaat, soorlu manna tikillugu imermik imerneqartussamik minguitsumik ajornartoornermi pilersuiffiusunut qulingiluaasunut suli aallersinnaapput, taakkua illoqarfik tamakkerlugu assigiinngitsuni inissisimapput atuarfik aamma utoqqaat illuat ilanngullugit.

 

Taamaattorli inuttaasut maqittakkamik imaluunniit tankimik imiisivillit imeq manna tikillugu pisarnermisut atorsinnaanngilaat. Pinngortitamut Avatangiisinullu Naalakkersuisoqarfik nalunaarpoq: “Nunatsinni Nakorsaanerup imermit misissuinermi paasineqartut  nutaanerpaat tunngavigalugit imatut naliliivoq. Imeq suli imerneqartussatut atorneqarsinnaanngilaq. Taamatuttaarlu imeq uffarnermut, kigutigissarnermut, atisanik errorsinermut immaluunniit allamut atoqqusaanngilaq. Taamaattorli Nunatsinni Nakorsaanerup inassutigaa anartarfimmeereernermi erngup assannik errornermut atorneqartarnissaa. Imeq aamma suli anartarfimmik kuutsitsinermut atorneqarsinnaavoq.”