Uummannami ”backstage”: Uummannami imeq imerneqarsinnaasoq ilungersuutigalugu sulissutigaarput

Uummannami imeq imerneqarsinnaasup mingoqarunnaarsinnissaanut suliaqarneq pillugu tusagassiuutitigut nalunaaruterpassuit tamaasa malinnaaviginissaat ajornakusoorsinnaavoq. Taamaattumik Nukissiorfiit iliuuserineqartut aamma suliat amerlasuut ilaat uani assitalersorlugit saqqummiuppaat.

Imeqarfimmit imeq atorneqarsinnaasunngoraluartoq arlalinnik pisortatigoortumik periusissaqarpoq erngup imerneqartussap kuutsinneqarsinnaasup mingoqannginnissaa qulakkeerniarlugu.
Tamanna ilaatigut erngup aqqutaanik, illoqarfimmi illunut tamanut ingerlaartunik, salillugit kuutsitsivigisarnerisigut ingerlanneqarpoq.

Suliaq tamanna aallartinneqarpoq, soorlu uani assimi takuneqarsinnaasoq.

Imertarfiit aamma erngup salillugu kuutsittaqattaarneranik periutsit ullut tamaasa ingerlanneqartarput, erngup aqqutaani imeq naammattoq pigineqaraangat.

Marlunngornermi ullormi 8/10-2019-imi kuutsittaqattaarlugu illoqarfiup immikkoortuani nutaami erngup salinneqarnera iluatsilluarpoq, takusinnaavarpullu inernerit pitsanngorsimasut.

Maannakkumut inuit namminneq erngup aqqutai illunut ingerlasut aamma erngup aqqutai kuutsittaqattaarlugit salinneqareerput – malunnaateqarluartumillu inernerisigut pitsanngortitsisoqarluni.

 

Biilinit imertaassuarnit pilersuineq
Nukissiorfiit imermik pajuttaataat biilit tungujortut, imermut Ikerasammeersumut atorneqarsimasut, imaarneqarput imeqarfimmillu imermit kuutsitsivigisaqattaarlugit salinneqarlutik immikkullu klorimik akoqqeriarlugu kingornatigut unnuisinneqarlutik.

Klorimik aamma uuliamik akoqarnersut misissorneqarpoq, inernerilu pitsaasuullutik. Taamatuttaaq biilit imertaassuit sungaartut pineqarput, taakku Nukissiorfiit Aasianni suleqatinit attartugarai.

Biilit imertaassuit taakku marluk pingasunngornermi (9/10-2019) ullaakkut imaaqqinneqarput Uummannamilu imeqarfimmeersumit imermik ulikkaarlugit immerneqarlutik. Nukissiorfiit biilinit imertaassuarnit imermit immikkamit misissueqqaarput pajutassanut pajugutigineqalinnginnerani, misissukkat laboratoriami angallattakkami illoqarfimmiittumi misissorneqarput.Inerneri piareeriarpata biilit taakku imertaassuit marluk imermik katillugu 14.000 literimik sullitanut pajuttuissapput. Naatsorsuutigaarput taamatut ullormut 2-3-eriarluta pajuttuisarnissarput. Tamatumunnga assersuutigalugu ullormut 4.000 aamma 6.000 literimik imermik Ikerasammit aallertarpugut.

Misissukkat tamarmik piareeriarpata illoqarfiup imeqarfianit illoqarfimmi tankit imermik immersorlugit aallartissaagut. Imiisiviit illoqarfimmi assigiinngitsuni inissisimapput, Nukissiorfiillu sulisuisa qulleqarnissaat isumagisimavaat, taamatut innuttaasut unnukkut imertarunik takusinnaaniassammata.

 

Laboratoria angallattagaq

Laboratoria angallattagaq atulersinneqarpoq, siunertarineqartorlu malillugu atorluni.

Laboratoriap angallattakkap atorneqarneratigut erngit misissugassat pilertornerusumik misissorneqarsinnaapput, imermit misissugassat Danmarkimut nassiunneqartariaarummata. Taamaattumik imermit misissukkat nal. akunneri arlalialunnguit qaangiunneranni paasisaqarfigineqarsinnaapput, nassiunneqarsimasuuppata ullut tallimat qaangiunneranni aatsaat paasineqarsinnaanerat naatsorsuutigisariaqartarsimagaluarluni.

 

Innuttaasunik tullianik ataatsimiitsitsinissaq

Nukissiorfiit innuttaasunik ataatsimiigiaqquseqqippoq sisamanngornermi ullormi 10/10-2019 nal. 18.30 Timersortarfimmi. Tassani suliap sumut killinnera kingulleq saqqummiunneqassaaq.

Nukissiorfiit neriupput innuttaasut amerlasuut takkutissasut, soorunalimi kaffeqarlunilu teeqassaaq, aamma nutserisoqarumaarpoq.

 

Nittartakkatsinni pisoq suli malinnaavigineqarsinnaavoq, ullormiit ullormut qanoq pisoqarnera nittartakkatsinni takusinnaavat:

https://www.nukissiorfiit.gl/kundeservice/uummannaq/