Sisimiuni erngup nukinganik innaallagissiorfeqarneq ukiunik qulinngortorsiortoq

Ukioq manna Sisimiuni illoqarfiup erngup nukinganik innaallagissiorfimmit innaallagiaqalerneranit ukiut qulit qaangiussimalerput.

Allannguutinut malunniutaanerpaanut ilaasut ilaat tassavoq, dieselimik innaallagissiorfiup eqqaatalu nipiliorusaarunnaarnerata sajukulaarunnaarneratalu kingorna nipaarunnera. A
amma qalipaatip kusanaallisimanera aanngarsimavoq.
– Sulinerup tungaatigut aserfallatsaaleeriaaseq allarujussuaq sungiunniartariaqarsimavarput, matumani erngup nukinganik innaallagissiorfimmik illoqarfimmit 30 kilomiiterinik ungasitsigisumiittumik sulisoqanngitsumillu ingerlatsineq nakkutilliinerlu ilanngullugu. Aammattaaq sulinermi avatangiisit atugassarititallu pitsanngoriarput, Jan Zachariassen, nuanap immikkoortuani Qeqqani pisortaq oqaluttuarpoq nangillunilu,
– Tamanit pingaarnertut akuutissanik ulorianartunik passussinerit sunnertinnerillu annikillipput soorluttaaq sulinermi avatangiisit pitsanngortut.

Sanaartornermut atatillugu sulisunut attuumassutilinnut pikkorissaanerit ingerlanneqarput, soorluttaaq sanaartornermut malitsigisaanillu nakkutilliinermut atatillugu sanilerisanik ilinniartitsinerit ingerlanneqarsimasut.

 

Paasissutissat: Erngup nukinganik innaallagissiorfiup sananeqarnerata ingerlarnga

7/6-2007: Maskiina siulleq tikippoq Kangerluk ungallermut

20/9-2009: Aqqutissaa naammassivoq

20/9-2009: Tatsimut qaartitassaq piareermat qaartinneqarpoq

24/9-2009: Immiinermut najoqqutaq malillugu sulluliarsuaq imermik immerneqarpoq

04/10–2009: Sulluliarsuarmi erngup naqitsinera sakkortunerpaamut inissinneqarpoq tigooraavillu (indtagslukker) tulliullugu ammarneqarluni.

10/10-2009: Kaavittut siullermeerlutik kaavisinneqarput

31/10-2009: Innaallagissap aqqutaa sakkortussusilerneqarpoq (63,5kV)

15/11-2009: Erngup nukinganik innaallagissiorfik dieselmotoorit tapertaralugit Sisimiunik pilersuivoq

16/11-2009: Sisimiut erngup nukinganik innaallagissiorfimmit taamaallaat siullermeerluni pilersorneqarput

 

15/3-2010: Sapaatip akunnerini pingasuni misiliummik ingerlatsineq naammassineqarpoq

7/4-2010 Sisimiuni erngup nukinganik innaallagissiorfik pisortatigoortumik atoqqaarfissiorneqarpoq