Qinngutsinni nappaanersiorneq

Nuummi Qinngutsinni inuit 3.000-it pallillugit najugaqarput. Tamatuma kinguneranik nutaamik aamma anginerusumik innaallagissap aqqutaanik pisariaqartitsisoqarpoq, tassani illoqarfiup immikkoortortaani najugaqartut amerliartuinnartut pilersorniarlugit

 

Innuttaasoqarnera eqqarsaatigalugu Qinngutsinni maanna Maniitsumisut, Aasiannisut aamma Upernavimmisut amerlatigisunik innuttaasoqalereerpoq. Sarfamillu annertuumik pisariaqartitsisoqarpoq illoqarfiup immikkoortortaani tassani atuinermik aamma allanik ineriartortitsilluni pilersaarutinik malinnaasoqassappat.

Taamaattumik septembarip ulluisa aqqarnanni transformerstationissamik nappaanersiortoqarpoq, taanna illoqarfiup immikkoortortaata ineriartortitseqqinneranut pingaaruteqartunut ilaavoq. Tamaani innaallagissap aqqutaanik annertussaanermut alloriarneq taanna siulliuvoq.

Transformerstationi aammattaaq Nuup illoqarfittut immikkoortortaavanik Siorarsiorfimmik pilersuinermut pingaaruteqarpoq. Taamaattumik transormerstationi illoqarfiit pingaarnersaata nutaaliamik aamma isumannaatsumik siunissami pilersorneqarnissaata qulakkeerneqarnissaanut pingaaruteqarluinnarpoq.

Nukissiorfiit teknikeqarnermut pisortaa nutaamik transformerstationissap nappaanersiorneqarnerani imatut oqalugiarpoq:

Asasakka tamassi

Nukissiorfiit sinnerlugit qujavunga pisumut matumunnga pingaarutilimmut ornigunnissinnut.

Imaanngikkaluarpoq manna nappaanersiornerusoq, tassami igalaat aamma matut ikkussorneqareermata. Kisianni iluaqaaq illup iluaniissinnaanerput uani stationimi nutaami.

Transformerstationi Qinngutta aalajaatsumik innaallagissamik pilersorneqarnissaanut pingaaruteqartut ilagaat. Nuummi illoqarfiup immikkoortua 2002-miilli maanna 3.000-it pallillugit innuttaasoqalersimasoq siunissamilu ineriartoqqinnissamut pissanganartunik amerlasuunik pilersaaruteqarfiusoq.
Taamatut ineriartornerup kinguneranik maannakkut Qinngutsinni atuuttup innaallagissap aqqutaa 10kV artorsartinneqarpoq. Pilersuineq malinnaasinnaanngilaq aamma aalajaakkunnaassaaq Qinngutsinni nunaminertat sanaartorfissat naammassippata, ingammillu illoqarfiup immikkoortortaava Siorarsiorfik ukiut arlalinnguit qaangiuppata sanaartorfigalugu naammassineqarpat. Taamaattumik pilersaarutaavoq 60kV-imik nutaamik innaallagissap aqquteqalernissaa, uannga transformerstationimiit Qinngutta tunorpiaata tungaanut, qaartitikkanut toqqorsivitoqqap eqqaanut. Taamaattumillu tassa ullumi katersuuppugut.

60kV-imik nutaamik innaallagissap aqquteqalernissamut ledningit mittarfittaamut, parnaarussivittaamut, stationip eqqaa tamaat, Hans Lyngep Atuarfianik, Sulorarmi aamma Igimami najugaqarfinnik pilersuisinnaalissapput, kiisalu Suloqqap kingornatigut nunaminertat nutaat sanaartorfissat tamaangalu killikkutta Siorarsiorfiup tungaanut.

Nunap iluani nalillit takunissaat nalorninartuaannartarpoq. Kisianni transformerstationi angisooq massumatut ittoq siunissami 132/60kV-mik aamma 60/10kV-mik innaallagissiorfeqartussap nutaaliaasumik aamma siunissamik qulakkeerinnilluni Nuummi sarfamut aqqutissamik siaruarterissaaq.

Ilisimavarput suliassaq annertuujusoq taamatut amerlatigisunik ataatsimoortunik sanaartorfimmi ataatsimi suliassaqartoqarnera.

Taamaattumik eqqaaneqassaaq Nukissiorfiit nuannaarutigimmassuk suliassap pitsaasumik ingerlanneqarnera. Ataatsimoorluta aaqqiissutissarsissaagut, aamma suliassat ilisimasaqarfigaagut, taamaattumik ataatsimoorluta naammassinissaa qularutiginngilarput. Pitsaasumik suliaqarneq ukiorpassuarni tulluusimaarutigisinnaasarput.

Naak tamanna ajornaatsuinnaanngikkaluartoq entreprenørinut aamma pisisarfinnut assigiinngitsunut qujassuteqartariaqarpugut, taakku tassaapput:
– Sanaartortitsinermi siunnersuisugut INUPLAN (Thorkil Olsen aamma Henrik Jørgensen),
– Rambøllimit sanaartortitsinermi siunnersuisut (John Telling aamma Erik Grundtvig (illumik titartaasut),
– Innaallagiaq PAP-imeersoq (Jesper Andersen aamma Per Skov Ibsen),
– Assaanermi entreprenørigut (Entreprenør aamma  Minørfirma v/ Dennis Hvirring Pedersen
– Illuliorneq aamma toqqaviliornerit (Hansenbyg v/Ebbe Hansen),
– innaallagissamik suliaqarneq (FJ-EL v/Finn Joensen aamma Elcon, kingusinnerusukkut suliaqartussat)
– qalipaaneq (Malerfirmaet Arnskov v/Lars Arnskov)
– soorunalimi aamma pingaarnertut pisiffigisavut Siemens aamma ABB.

Tamassinnut qujanarujussuaq, pitsaasumik suliaqartoqarnissaa qularinngilarput. Taamaattumik angusaqarfiulluartumik tatigeqatigiillunilu suleqatigiittoqarnissaa, naatsorsuutigaarpullu transformerstationi nutaaq aappaagu maajimi naammassineqarluni atoqqaartinneqarnissaa.

Ataatsimoorluta maannamut angusarput ulloq manna nalliuttorsiutigisigu. 

Qujanaq