Nunarput tamakkerlugu imeq minguitsoq

Ulloq 1. juuli misiliineq kingulleq naammassivoq taamaalillunilu Isertumi qalatitseqqaarnissamik inassuteqaat atuukkunnaarpoq. Taamaalilluni Nukissiorfiit imeqarfiini tamani nalunaarutigineqarsinnaalerpoq nuna tamakkerlugu imermik minguitsumik pilersuineq

– Pisoq angusarput oqaluttuarisaanermut ilannguppoq, tassa Kalaallit Nunaanni qalatitseqqaarnissaq atorunnaarmat. Tamanna nunat allat amerlanngitsut angusinnaavaat, soorlu Danmarkimi akuttunngitsut assersuutigisartagarput, soorlu assersuutigalugu qalatitseqqaaqqusisarput. Assut tulluusimaarutigaarput erngup imerneqartussap pitsaassusiat, Nukissiorfinni pisortaanerugallartoq Claus Andersen-Aagaard oqaluttuarpoq.

Tamanut imermik pilersuinerup nuna tamakkerlugu misissorneqartarnissaa 2017-imi atuutilermalli assersuutissat amerlasuujupput, atuisartut imermik imigassaminnik iminnginnermini qalatitseqqaaqqusaasarnerat. 2007-imi ikinnerpaamik nunap ilaani sumiiffiit arlaanni imeq qalatseqqaarneqartussaasarpoq, allaat 2016-imi illoqarfinni aamma nunaqarfinni assigiinngitsuni 20-ngajanni imeq qalatseqqaaqqusaavoq. Ataasinngorneq 1. juuli 2019 Isortumi qalatitseqqaarnissamik inassuteqaat atorunnaarpoq, taamaalilluni aatsaat siullerpaamik nunatsinni qalatitseqqaarnissamik inassuteqaammik atuuttueruppoq.

Tamatuma ukiuni arfinilinni Nukissiorfinnit anguniaqarusulluni iliuuseqarnerup kinguneraa, tassa erngup imerneqartussap pitsaassusiata pitsaanerulernissaanik aammalu erngup imerneqartussap passunneqarnerani periutsit nalinginnaasut nutaat atulernerisigut.

– Ukiuni kingullerni qalatitseqqaarnissamik inassuteqaatit malunnaateqarluartumik ikileriarsimapput. Tamatumunnga siullertut pissutaaneruvoq sulisutta pikkorissut aallussilluarnerat. Sulisutsinnut tamanut qasujuillutik tamatuma piviusunngornissaanut sulissutiginnissimasunut assorsuaq qujavunga! Tamanna iliuuseqarnitsinni pingaaruteqarluinnartuuvoq Kalaallit Nunaanni imermik pilersuinermik nutarterinermi aamma pitsanngorsaanermi. Alloriarneq pingaaruteqartuuvoq Naalakkersuisut Nukissiuuteqarnermut imermillu pilersuinermik immikkoortumut pilersaarutaanni anguniakkap Kalaallit Nunaanni imermik pilersuinermut tunngasup piviusunngortinnissaata qanillattorneranut. Taamaattorli neriorsuutigisinnaanngilarput qalatitseqqaarnissamik inassuteqaammik pisoqaqqinnginnissaa, kisianni titarneq ajunngitsumik ingerlavoq aamma angusaq pitsaalluinnartoq ullumikkut anguarput, Claus Andersen-Aagaard naggasiivoq.

Paasisaqarnerorusukkuit uunnga saaffiginnigit:
Aqutsisoqarnermi allatseqarfimmi pisortaq Sune Tougaard  Tlf: 34 95 89
Mail: lg.ti1568630943ifroi1568630943ssiku1568630943n@otu1568630943s1568630943