Nunaqarfimmi aqutsisoq Dronningip Nersornaasiuttagaanik maanna saqqarmiortaarpoq

Kangaamiuni nunaqarfimmi aqutsisoq Jakob Thomassen sapaammi decembarip 15-anni 2019 Ataqqinartorsuup Dronningip Nersornaasiuttagaanik sølviusumik saqqarmiulerneqarpoq

Nunap immikkortuani pisortaq, Jan, nersornaammik saqqarmiuliillunilu Jakob Thomassenimut oqalugiarpoq. Saqqarmiuliineq Taseralimmi Nukissiorfiit Jakobillu ilaqutaasa peqataaffigisaannik katersuunnikkut ingerlanneqarpoq.

Nersorinnissut innersuunneqarnikkut kiisalu pisortani sivisuumik aalajaatsumillu sulisimanikkut tunniunneqarsinnaavoq – tassa imaappoq ukiut 40-t sinnerlugit sulisimanikkut.

Jakob Thomassen maskiinalerisutut 1974-mi ilinniareernermi kingorna Kalaallit Nunaanni pisortani nukissiuuteqarnerup tungaatigut annerusumik suliaqarsimavoq.

Siullermik Maniitsumi innaallagissiorfimmi 1975-miit 1977-mut sulisimavoq. 1977-miit 1979-mut suliffeqarfimmi namminersortumi sulilaareerluni novembarip aallaqqaataanni 1979-mi Kangaamiuni innaallagissiorfimmi aqutsisutut atorfinitsinneqarpoq ullorlu manna tikillugu sulilluni.

”Sulisitsisoq” qanorluunniit GTO-tut, NunaTec-itut, Kommunip teknikkeqarnermut ingerlatsiviatut imaluunniit Nukissiorfittut taaguuteqaraluarpat, Jakob Thomassenip suliami piffissaq eqqorlugu minnerunngitsumillu pitsaalluinnartumik naammassinissai  pingaartittuarpaa.

Nukissiorfiit Jakobimut ilaqutaanullu pilluaqqusingaarput.