Nukissiorfinni atuisunik sullissineq pitsaanerusoq aamma allaffissorneq annikinnerusoq

Nukissiorfiit maannakkut digitali atorlugu aaqqiinerit amerlanerit atuisartunut atugassaritilerpai. Tamanna pivoq digitaliseriinermik sulissuteqarnikkut suliffeqarfiup ukiuni kingullerni sulissutigisimasaa, suliaqarnerlu tamanna suli naammasseqqajanngilaq. Digitaliseriineq annertunerusoq atorlugu atuisartunik pitsaanerusumik sullinneqarnissaat qulakkeerneqarpoq aamma Nukissiorfiit isumalluutai pitsaanerusumik atorneqarlutik, ilaatigullu ataavartumik nukissiamik pissarsiffiusinnaasunut nuukkiartornermut atorneqarsinnaallutik, tamannami Naalakkersuisut aamma Nukissiorfiit anguniagaannut qitiuvoq.

Aningaasaqarnermut pisortaq Claus Andersen-Aagaard ima oqaaseqarpoq:

Nukissiorfinni atuisartutsinnut aamma inuiaqatigiinnut tamanut annertuumik akisussaaffeqarpugut, taamaattumik pitsanngorsaanissamut periarfissat assigiinngitsut ingerlaavartumik qimerloortuarpagut, tamakkunatigut qulakkeerneqassaaq atuisartutta pitsaanerpaamik sullinneqarnissaat aamma akigitinneqartut appasinnerpaanissaat. Nuannaarutigaarput atuisartutsinnut tamanut aaqqiissutit digitaliusut neqeroorutigisinnaagatsigit, naak aamma taakkua ilaat smartphoninik peqanngikkaluartut aamma internetimut isersinnaannatik.

Nukissiorfiit ilisimatitsissutigaat ukiaru akiligassiissummik SMS aqqutigalugu pissarsisoqarsinnaanissaa aamma atuisunngorneq aamma atuisuujunnaarneq soorlu assersuutigalugu imermik pajunneqartarnermi SMS aqqutigalugu pisinnaalissasoq. Tamatuma atuisartut Nukissiorfinnut ornigullutik saaffiginninnissaat pisariaqarunnaarsissavaa tamatumunngalu ilutigitillugu Nukissiorfiit allaffissornermi aningaasartuutinik sipaaruteqassapput. Atuisartut smartphone-mik peqartut aammattaaq periarfissaqalissapput ilaatigut akiliisarnermut tunngasunik nutaanik. Atuisunngornermi aamma atuisuujunnaarnermi nalunaaruteqartarneq digitalimik Sullissivik aqqutigalugu akeqanngitsumik ingerlanneqarsinnaavoq, akerlianik allattuilluni immersuilluni periuseq allaffissornermilu oqimaatsoq atoraanni akitsuummik akiliisitsisoqartarpoq.

Claus Andersen-Aagaard nangippoq:

Nuannaarutigaarput atuisartugut eqaatsumik aaqqiissuteqarnissamik neqeroorfigisinnaagatsigit taakkununnga ulluinnarni ajornannginnerusumik. Allannguutissat pilersaarutaasut aammattaaq kingunerissavaat allaffissornermi sullissinerup annikinnerulernera atuisartunut taamatuttaaq Nukissiorfinnut aamma taamaattumik aaqqiineq tamanna tamanut iluaqutaavoq.   

Digitaliseringip annertunerusup kingunerisaanik atuisartut ornigullutik sullinneqartarnerat pisariaarutissaaq. Tamatuma kingunerisaanik augustip naanerani, ataasinngornermi augustip 31-at ulloq taanna kingulliuvoq Nukissiorfiit illoqarfinni allaffiinut ornigulluni sullinneqarsinnaaneq. Nunaqarfinni ornigulluni sullinneqarsinnaaneq allanngortinneqassanngilaq, taamaattorli digitalit aqqutigalugit periarfissat nutaat soorunami aamma nunaqarfinni innuttaasunit atorneqarsinnaassapput.

Nukissiorfiit telefonikkut atuisartunik sullissinerat 80 11 50 akeqanngitsumik sianerfigineqarsinnaasoq atorpoq, tassani atuisartutsinnik tamanik, sapinngisamik pitsaasumik, ikiuinissamut piareersimavugut.

Saaffiginniffissaq: itisiliititsilluni apeqquteqarniaraanni.