Nukissiorfiit ataavartumik nukissiaqarnissamut Igalikumi suliniutaa ingerlaqqippoq

Igalikumi nunami assaaneq annertooq ukiuunerata qaangiunnerani aallarteqqippoq . Tamanna pivoq misileraalluni suliniutissaq, nunaqarfimmik mingutsitsinngitsumik nukissamik pilersuisussaq, killissaliuunneqassammat.

Piviusumik pineqartoq tassaavoq suliniut: ”Hybridimik nunaqarfinni pilersuineq – Igaliku”, tassani atortut assigiinngitsut atorlugit assigiinngitsunik ingerlatillit atorneqarlutik ( hybrid). Solcellenik, anorisaatinik aamma battereeqarfimmik ataatsimut kattussanik ilaqarpoq, aasaq mannalu atuutilersinneqarnissaa naatsorsuutigineqarluni. Taakkununnga taamatuttaaq ilanngunneqarluni generatori dieselitortoq nalinginnaasoq.

Nunaqarfiup dieselgeneratoriata maannakkut atuuttuusoq innaallagissamik nunaqarfimmik ullumikkut pilersuisuuvoq, taanna ukiuunerani qaammatini nunaqarfimmik pilersuisuusassaaq, naatsorsuutigineqarlunili aasap qaammataani taamaallaat seqinnertinnagu aamma anorlertinnagu sillimmataaluni atorneqartarnissaa.

Suliniut pillugu naatsumik:
Nukissiorfiit 2015/2016-imi suliffeqarfiup mingutsitsinngitsumik ilisarnaateqarnerata pitsaanerulersinnissaa siunertaralugu ataavartumik nukissiaqarnermut suliniutip tunngavissaa suliaralugu sulineq Nukissiorfiit aallartippaat.

Suliniummut atatillugu nakkutiginnittussanik suleqatigiissitaliortoqarpoq. Ilaatigut siunertaavoq suliatigut tunngaviusup pitsaanerulersinnissaanut aamma suliniutip siunertaata attatiinnarnissaa, aammattaaq minnerunngitsumik allat oqaluttuutissallugit suliniutip siuariartornera pillugu.

Suliniummik anguniagaasoq
Suliniut ” Hybridimik nunaqarfinni pilersuineq – Igaliku” ineriartortitassatut suliniutitut aallartinneqarpoq anguniagaqarluni makkuninnga:

  • nunaqarfinni nukissiamik pilersuinermut allanik periarfissanik misileraaniarluni
  • pilersuinerup CO2-mik mingutsitsinnginneruniassammat
  • hybrid atortumit ingerlatsinermut paasissutissanik datanik pissarsinissaq, Kalaallit Nunaanni nukissianik ataavartumik ineriartortitsisoqalinnginnerani
  • suliniut nunaqarfinni allani nukissiornermi malitassatut atorneqarnissaata iluaqutaanera nalilerniarlugu
  • nalilerniarlugu qanoq annertutigisumik hybridimik pilersuinerup ataatsimut isiginninnerusumik inuiaqatigiinni aningaasaqarniarnermut pitsaasumik kinguneqarsinnaanersoq.

Asseq:
Maani Igalikumi nunaminertami assaasoqalissaaq. Tassaniilissappummi solcellet aamma anorisaatit allallu aasaanerani qaammatini nunaqarfimmik innaallagissamik mingutsitsinngitsumik pilersueqataasussanik.