Illorsuarni innaallagissamik imermillu pilersuinerit matuneqarnissaanik ilimasaarut

Nukissiorfiit Illorsuarni innuttaasut 17. juuni 2017 qimarngussuunneqarnerisa kingorna innaallagissiorfiup imeqarfiullu ingerlaannarnissaat qulakkeersimavaa. Tamatumunnga siunertaasimavoq Illorsuit sarfamik imermillu pilersuunnarneqarnissaat. Nukissiorfiit najukkami sulisui aammattaaq qimarngunneqarsimapput, taamaalillutik taakku pisariaqanngitsumik nalorninartorsiussanngimmata qaqqamit sisusooqqittoqassagaluarpat. Manna tikillugu taamaallaat sivikitsuinnarmik orniguttoqartarsimavoq uulialiiniarluni, nillusaammik immiiniarluni il.il.

Taamaattoqarnerali ingerlaannarsinnaanngilaq tassami Nukissiorfiit uagut sulisutta isumannaatsuunissaat qularnaarsinnaanngilarput. Taamaattumik Illorsuarni innaallagissamik imermillu pilersuinerit tamarmik matuneqassapput.
Matusineq tamanna aallartissaaq ataasinngorneq 4. septembari 2017.

Nukissiorfiit Nuugaatsiami aamma Illorsuarni isumannaallisaanermut pissutsit ingerlaavartumik malinnaaffigaat, tamatumunnga ilanngullugit qaqqamit sisusooqqittoqassagaluarpat kalerrisaarutinik ikkussuiniarnermut tunngasut. Taamaattorli Nukissiorfinnit takuneqarsinnaanngilaq kalerrisaarutinik taamaattunik piffissami qaninnermi ikkussuisoqarnissaa piumaartoq, tamatumalu kingunerisaanik isumannaallisaanermut upalungaarsimaneq naammaginarnani, tassa Nukissiorfiit illersorneqarsinnaasumik sulisuminit innaallagissiorfimmut aamma imeqarfimmut suliartortitsilluni misissuiartortitsillunilu Illorsuarnukartitsisarneranut.

Atuisartut qinnuigineqarput septembarip pingajuat nallertinnagu matusinissamut pilersaarutaasumut oqaaseqaatissaqarunik saqqummiusseqqullugit, tamatumunnga ilanngullugit illuminnut, pequtiminnut il.il. immikkut ittumik kinguniusinnaasut.

Nukissiorfiit sulisuisa sullittakkat atortuinik, pequtaannik il.il. matusinerup kingunerisaanik ajoqusertoqassagaluarpat qulakkeerinninnissaat ajornarpoq. Allatut ajornartumik piginnittut ataasiakkaat tamanna namminneq akisussaaffigisariaqarpaat.

Tamatumunnga atatillugu saqqummiunneqassaaq:
tassa Nukissiorfiit allatut ajornartumik atortut, nioqqutissat il.il. (qerisut, tillinneqarsinnaasut il.il) ajoquserneqarnerat sunaluunniit akisussaaffigisinnaanngilaa. Tak. Tuniniaanermi piumasaqaatit innaallagissamik, imermik kiassaanermillu tamanut pilersuinermi piumasaqaatit normu 9, 6. juuni 2014 atuutilersuni, pisut siumut takorloorneqarsinnaanngitsut pillugit:

“Pinngortitami ajunaarnersuaqartillugu, sorsuttoqartillugu, pikitsitsisoqartillugu, aserorterisoqartillugu, ikuallattoqartillugu, qaartoortoqartillugu, suliumajunnaartoqartillugu pissutsilluunniit allat Nukissiorfiit nakkutigisaasa avataaniittut malitsigisaannik sunniutit pilersuinermik kipisitsisut Nukissiorfiit akisussaaffiginngilai.”

Pilersaarutaasumik matusinissamut tunngatillugu Nukissiorfiit atassuteqarfigikkit.

Pilersaarutaasumik matusinissaq pillugu Nukissiorfinni inuit atassuteqarfigineqarsinnaasut tassaapput:
Nunap immikkoortuani pisortaq Kjell Bergmann. lg.ti1542345469ifroi1542345469ssiku1542345469n@bej1542345469k1542345469 telefon 54 92 92
Allaffiup pisortaaq Franz Petersen. lg.ti1542345469ifroi1542345469ssiku1542345469n@epr1542345469f1542345469 telefon 95 41 02
Nukissiorfiit Kiffartuussivia. lg.ti1542345469ifroi1542345469ssiku1542345469n@eci1542345469vrese1542345469dnuk1542345469 telefon 80 11 50

Pilersaarutaasumik matusinissamut oqaaseqaatinik saqqummiussinissamut piffissaq kingulleq tassaavoq:
3. septembari 2017.