NukiFakta

Nukissiorfiit suliffeqarfiuvoq nukissamik pilersuisuusoq, anguniagaraalu ullut tamarluinnaasa nukissamik kalaallinut inuiaqatigiinnut tatiginartumik aamma avatangiisinik mianerinninnikkut pilersuinissaq.

Imermik, innaallagissamik aamma kiassarnermik Kalaallit Nunaat tamakkerlugu atuisartut amerlanerpaartaannut tunisassiornissaq aamma siaruarterinissaq akisussaaffigaarput, ilutigalugulu nammineq suliffeqarfimmut atatillugu sanaartugassanut sanaartortitsisuulluta.

Ullumikkut Nukissiorfiit Kalaallit Nunaanni suliffeqarfiit annersaannut ilaavoq, 370-nik atorfilinnik sulisoqarluni (ukiumut naatsorsorlugu), taakkunanngalu 60-it miss. qullersaqarfimmi sulillutik.

Nukissiorfiit suliffeqarfiuvoq nammineq imminut aquttoq Namminersorlutik Oqartussanit pigineqartoq. Nukissiorfiit 2016-imi Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu allanut Naalakkersuisoqarfimmit oqartussaaffigineqarpoq naalakkersuisumit Vittus Qujaukitsoq (Siumut).

Aningaasaqarnermut tunngasut nalunaarutit uani atuakkit, aamma naleqartitat takorluukkallu, suliffeqarfiup aaqqissuussaanera aamma oqaluttuarisaanera.

roll-up-2