Innaallagissiorfimmi formandi

“Suliffeqarpunga imminut unammillertarlunga, ulluinnarnilu suleqatikkalu suliarisartakkatta pitsaanerulernerisa inernerat takusarpakka.”

Henning Mogensen

Henninggrlsk

Suliatigut ineriartorneq unamminartullu
Ilulissani nioqqutissiornermut immikkoortortaqarfimmi innaallagissiorfimmi formanditut sulivunga. Ilulissani innuttaasut innaallagissamik kiassaanermillu aalajaatsumik piujuaannartitsiumillu pilersornissaasa qulakkeerneqarnissaat akisussaaffigaarput. Ulluinnarni ingerlatsinermik aserfallatsaaliinermillu Ilulissani innaallagissiorfimmi kiassaateqarfiutigisumi suliaqartartuuvunga. Aammattaaq akuttunngitsumik immikkoortortaqarfinni allani ikiuuttarpunga, pigaartuusutulu suliartoqquneqaraangatta Ilulissani immikkoortortaqarfimmut atasut nukissiuutit tamaasa akisussaaffigisarlugit. Innaallagissiorfimmi formanditut tamatigut ilikkagassaqartuaannarpoq. Ullut tamaasa tupaallaatigiuaannarpara suliakka pissanganartuujuaannartarnerat unamminartoqartarnerallu.

Naammaannartuunngisaannarpoq
Nukissiorfinni (Nunatek-Nukissiorfinni) ukiuni 25-ni atorfeqarsimavunga. Suliffeqarfik suliassallu piffissami tamatumani atorfeqarnerma nalaani annertoorujussuarmik ineriartorsimapput, taamaattumik maani sulineq naammaannartuunngiisaannarpoq. Soorlu assersuutigalugu illoqarfimmi innaallagissamik kiassaanermik qaminneqarsinnaasumik pilersorneqaqqammerpugut, Paakitsumilu imermik nukissiorfiup nutaap tunniunneqarnissaa qitiutillugu suliaqarluta, taamaammat nutaamik pisoqartuaannartarpoq.

Pikkorissarnerit akisussaaffillu
Immikkoortortaqarfitsinni akuttunngitsumik pikkorissartarpugut teknikkimillu nutaamik imaluunniit atortoq nutaaq pillugu ilinniartitsinerni peqataasarluta, tassami uagut suliatta iluanni ineriartornermi peqataajuaannartariaqarpugut. Nammineq piginnaasatigut ineriartortoqalersarpoq, tamanna sulinermi nutaamik nukissaqalersitsisarpoq. Misigaanga uanga allanngortitseqataasuullunga. Suliatsinni pingaarnerpaasoq tassaaviq Kalaallit Nunaanni nutaaliaasumi pingaaruteqarnerput. Tamatuma aammattaaq kinguneraa suliffimmi akisussaaffimmik annertuumik peqarnera – ajornartorsiuteqartoqarpat suliartortariaqartarluni, aammattaaq tamanna pissappat unnuakkut nalunaaqutat marlunut.
Qujanartumik suleqatigiilluartuuvugut, pigaartuunermi aaqqissuussineq pitsaasoq, taamaattumik tamanna ajornartorsiutaanngilaq.

Qinnuteqartumut siunnersuutitsialak
Takutiguk nutaaliortuunerit, suliannik sukumiisumik suliaqartartuusutit suliatigullu pikkorissuunerit. Tamakku tassaapput Nukissiorfinni pisariaqartitagut.