Pikkorissarnerit teknikimut aamma allaffissornermut tunngasut

”Ilinniarsimavunga ilinniakkat uanga suliatigut inuttullu piginnaasannik ineriartortitsisuusimasunik”

Ovenguaq Lyberth

 
OvenguaqGRLSK

Teknikkimik aamma allaffissornikkut ilinniagaqaqqinneq
Nukissiorfinni sulinerma nalaani ingerlataqarsimavunga. Teknikkimut tunngasut pikkorissarnerit /ilinniarnerit soorlu assersuutigalugu el-installatøritut ilinniarneq, L-AUS aamma DEIF pillugit pikkorissarnerit, innaallagissamik ikkussuinerit isumannaatsumik suliarisarnissaannut tunngasut, aamma qanoq generatoriutitta aqunnissaat softwarenullu atortuutigut. Taakkua saniatigut aammattaaq allaffissornikkut pikkorissarnerit soorlu suliniutinik aqutsineq, aqutsisutut tunngaviusumik ilinniarneq aamma sullivinni avatangiisit pillugit ilinniarnerit ingerlassimavakka. Uannut pingaartuuvoq piginnaasama ineriartortinnissaat, taamaaliornikkut suliannut pikkorinneruleriartuaarnissara piniassammat imminullu unammillertarniassagama.

Qaffariartornissamut periarfissat
Ilinniarnera annertunerusunik akisussaaffeqarnerulernermik kinguneqarpoq. Soorlu assersuutigalugu liniemesterinngorpunga elinstallatøritut ilinniareerama, ullumikkullu Aasianni innaallagissamik siaruarterinerup iluani sulisunut aqutsisuullunga.  Unamminartuusimavoq ilinniarnerit ingerlatissallugit. Ingammik ilinniarnerit Danmarkimi ingerlatat eqqarsaatigalugit ilaatigut Nunatsinni ilaannaalluunniit ingerlattariaqarsimagakkit – kisianni tamarmik akilersinnaalluarput. Ullumikkut ilinniakkakka tamarluinnaasa Nukissiorfinni nalinginnaasumik sulininni iluaqutigaakka.

Sulisut qitiutinneqarluarput
Pikkorissarnerit assigiinngitsut ilinniarnerillu ingerlassimassanngikkaluarpakka Nukissiorfiit aningaasartuutit tamaasa matusimanngitsuuppatigik. Isumaqarpunga tamanna pitsaasuusoq, sulisut piginnaasaat qitiutinneqarnerat, tassami suliffeqarfimmi ilinniakkagut atortarpagut.