Biilit innaallagiartortut batteriisa immertarnerat

Biilit innaallagiartortut imermit nukissiamit nioqqutissiarineqartumit innaallagissamut ingerlasinnaanerat periarfissinneqarpoq. Illoqarfinni imermik nukissiorfeqarfiusuni inissiarsuarni pisortanit pigineqartuni najugaqartunut amerlasuunut biilit innaallagiartortut batteriisa immersornissaannut periarfissagissaarpallaanngitsutut isikkoqarpoq. Tamanna tunngavigalugu Namminersorlutik Oqartussat aamma Nukissiorfiit 2016-imi misiligutaasumik suliniut Nuummi biilit innaallagiartortut batteriisa immersorneqartarnissaannut tunngasoq aallartippaat.

Misiligutaasumik suliniut marlunnik immikkoortortaqarpoq. Siullermik biilit batteriinut immiisarfiit illorsuit pingasut eqqaannut inissinneqarput namminersortut nalunaarnermikkut peqataaffigilersinnaasaat (Inuit ataasiakkaat ) Aappassaanik illoqarfimmi kikkunnit tamanit atorneqarsinnaasumik pinasuartumik immersuiffissamik ikkussisoqarpoq.

2018-imi misiligutaasumik suliniut nalilersorneqassaaq. Tamatuma kingornatigut isummerfigineqassalluni illoqarfinni imermik nukissiorfeqarfiusunut tamanut atuuttussamik biilinut innaallagiartortunut batteriinut immersuiffissamik ataavartuusussamik pilersitsinissaq.