Anorimit nukissiaq

Anorip nukinga siunissami nukissiuutinik pilersuinermi ataavartumit nukissiornermut pingaaruteqarlersinnaavoq. Canadamiit Alaskamiillu assersuutit takutippaat teknologi taanna issitumi atorneqarluarsinnaasoq.

 

Anorip nukinga innaallagissiornermi allanut tapiutitut atorneqarsinnaavoq. Sumiiffinni erngup nukinganik nukissiorfiusinnaangitsunut imaluunniit periarfissat atuutut atorluarnissaat akisuallaarpat naleqqussinnaavoq.

 

Anorisaatit atorneqarsinnaanerinut periarfissat Nukissiorfiit maannakkut misissorpaat. Siullermik Sisimiut Nanortalillu misissuiffiupput. Nukissiorfiit ukiakkut 2018-imi Sisimiuni nunaqarfinni anorisaatit marluk napparpaat. Anorisaatit taakku marluk nunatsinni sumiiffinni assigiinngitsuni anorisaatinik taakkununnga assingusunik nappaannginnermi misileraataassapput. Anorisaatinik ingerlatsinermik innaallagissiornermillu ingerlaavartumik misilittagaqalernikkut anorisaatit taakku marluk Kalaallit Nunaanni nukissiornermut atorneqarsinnaasunik ataavartumik sapinngisamik atuinissaq pillugu Nukissiorfiit anguniagaqarneranni alloriarnerit pingaaruteqarput.

 

Anorisaatip sumi ikkunneqarnissaanik nalilersuinnginnermi, anorip silallu pissusaasa ilisimanissaat pingaartuuvoq. Nukissiorfiit taamaammat sumiiffinni arlinni anorimik maannakkut uuttuipput, tassunga ilanngullugit Aasianni, Qasigiannguan, Nuummi Uummannamilu.