Ukiuni 25-ni imermit nukissiuuteqarneq

Ukioq manna Kangerluarsunnguami erngup nukinganik nukissiorfiup atoqqaarfissiorneranit ukiut 25-t qaangiupput. Tamanna nalliuttorsiutigissallugu tunngavissaqarluarpoq tassami taamanerniit erngummi nukinga nukissiornermi pingaarnerpaalersimavoq.Ukiuni 25-ini erngup nukinganik nukissiorneq Naalakkersuisut Nukissiorfiillu ullumikkumiit malunnartilissavaat. 2018-mi oktoberip ulluisa aallaqqaataani ullup nalliussivissap tungaanut assigiinngitsunik aaqqissuussinikkut, nutaarsiassatigut unammisitsisarnikkullu nalliuttorsiorneq malunnartinneqassaaq.

Inuussutissarsiornermut Nukissiuuteqarnermullu Naalakkersuisoq Aqqalu Jerimiassen oqarpoq:
”Erngup nukinganik nukissiornermut aningaasaliinerit tamatsinnut avatangiisitigut aningaasaqarnikkullu assut iluaqutaasimanerat paasinarsisimavoq. Tamatumalu nalliuttorsiutiginissaanut kikkut tamaasa qaaqqorusuppakka.”

Nangipporlu:
”Ukiut 25-t matuma siorna siunnerfigisimasarput nangissavarput, sulilu annertunerusumik erngup nukinga nukissallu ataavartut atussallutigit.”

Nukissaq ataavartoq 99 %
1993-imiilli Kangerluarsunnguami Erngup nukinganik nukissiorfik Nuummut innaallagissamik kiassarnermillu pilersuisimavoq. Ullumikkut Nukissiorfiit Nuummi innuttaasunut nukimmik pilersuineranni nukiup 99%-ia nukimmit ataavartumit pisarpoq. Naalakkersuisut siunertaraat 2030-imi nukik ataavartoq ajornanngippat sumiluunniit atorneqalersimassasoq.

”Ullumikkut tallimanik erngup nukinganik nukissiorfeqarpugut illoqarfinnik arfinilinnik pilersuisuusunik – sulili angusassaqarpugut. 2030-ip tungaanut Nukissiorfiit erngup nukinganut nukinnullu ataavartunut allanut, soorlu seqerngup anorillu nukinginut aningaasaliisarumaarput,” Inuussutissarsiornermut Nukissiuuteqarnermullu Naalakkersuisoq Aqqalu Jerimiassen oqarpoq.

Kikkut tamarmik qaaqqusaapput
Erngup nukinganik nukissiuuteqarluni ukiunik 25-nik nalliuttorsiornissamut kikkut tamaasa Inuussutissarsiornermut Nukissiuuteqarnermullu Naalakkersuisup Aqqalu Jerimiassenip ulloq 30. september 2018-imi qaaqquai. Tamanna Nuup qeqqani katersortarfimmi pissaaq, ulloq nalliussillugu kaffimik kagemillu sassaallertoqassaaq, aammalu meeqqanut inersimasunullu aliikkusersuisoqassalluni.

Kangerluarsunnguami nukissiorfik pillugu filmiliaq naatsoq nutaaq ulloq 28. august 2018-imit ullup nalliuttorsiorfissap tungaanut Nuuk Lokalmuseumip takutissavaa. Tamanna unnukkut aaqqissuussinikkut aallartinneqassaaq, Nukissiorfinni teknikkimut tunngasunik pisortaq Mogens Nielsen, aamma nukissiorfimmi sulisut erngup nukinganik nukissiorneq aamma nukissaq ataavartoq pillugit oqaluttuassallutik.

Septemberip ulluisa 22 aamma 23-ianni 2018, sapaatit akunnerata naanerani Kangerluarsunnguami nukissiorfik ammarneqarpat iluaniit takornariarneqarsinnaalissaaq, sulisullu nukissiorfimmi takornariartitsissapput.

Pisussat aamma ilaaniarluni nalunaarnerit pillugit Nukissiorfiit nittartagaanni annermik paasiniaagit: www.nukissiorfiit.gl.

Nalliuttorsiorneq nunami tamarmi Nukissiorfiit nittartagaanni, www.nukissiorfiit.gl aamma Nukissiorfiit Facebookiani malittariuarneqarsinnaavoq.