Siullersaq

Nukissiorfiit oqaluttuarisaaneranni AU1-imi ilinniakkamik taaguutilimmik ”International Transport og Logistik” ilinniartoq siullersaq naammassivoq. Taanna tassaavoq Saamu Rasmussen, Niuernermik Ilinniarfimmi ukiut marluk ilinniareerluni naammassisoq.

Saamu Rasmussenip Nukissiorfinniissimanini nuannaarutigaa, naak ilinniartutut piffissaq kingulleq unammillernarsimagaluartoq.
– Unammillernartut annerit tassaasimapput misilitsissutissanik suliaqarnerit. Sunngiffiga tassani eqqugaavoq. Taamaattorli aqqutaa soqutiginaqaaq, Nukissiorfiillu suliffitsialassuupput, taamaammallu unammillernartut aqqusaaraluarlugit naammassiniarnerup ingerlanera ajoriinnagassaanngilaq, Saamu Rasmussen nuannaaqaluni oqarpoq.

Nukissiorfiit Saamup ilinniartuutigisimanera nuannaarutigaat, tuniniaanermillu ilinniagalik nutaaq taanna pillugu pisortaa Line Bruun Jensen ima oqarpoq:
– Ukiut marluk Nukissiorfinniinnermini Saamu suliat tungaatigut inuttullu ineriartungaatsiarpoq. Aamma suleqatiminit nuannarineqaqaaq, Saamullu pisiniartartutut suleqatigiinnarnissaa nuannaarutigaarput.

Saamu Rasmussenip ilinniarnini juunip 30-ani pisortatigoortumik naammassissavaa, Nukissiorfiillu naammassinerani pilluaqqungaarpaat.

Billedtekst: Saamu Rasmussen tassaavoq Nukissiorfinni ilinniakkamik taaguutilimmik AU1/International Transport & Logostik naammassinnittut siullersaraat.