Nuummi innaallagiartortunik biilinik suliniummi peqataaneq akikinnerulissaaq

Maannakkut Nuummi biilit innaallagiartortoq akikinnerusumik orsersorsinnaalerpat inissiarsuillu eqqaanni biilinik innaallagiartortunik immiisarnermut misiliilluni suliniummut peqataallutit.

Nukissiorfiit biilinik innaallagiartortunik immiisarnermut misiliilluni suliniut, Nuummi oktobarimi 2016-imi aallartinneqartoq, nalilersorallarsimavaat. Suliniummut peqataanissaq pilerinarnerulersinniarlugu maannakkut Nukissiorfinnit akigitinneqartut appartinneqarput.

Ullumimiit atuutilersumik aamma akiliisarnermut atortussap atuutilernissaata tungaanut, kikkut tamarmik bilertik innaallagiartortoq pilertortumik immiisarfimmi Nuuk Centerip kiilerianiittumi akeqanngitsumik immersinnaalerpaat. Tamatuma saniatigut Nukissiorfiit ilanngunnermut akiliut 4000 koruunit atorunnaarsippaat, tassa innaallagiartortunik biiliutillit orsiisarfinnik illoqarfimmi inissiat eqqaanni atuisinnaalernermut siusinnerusukkut akilertagassaraluat. Siunissami taamaallaat akiliutigineqartassaaq paarnaarsaammut aamma matuersaatinut atornissamut qularnaveeqqut 1000 koruunit, qaammammut uuttuutinut atuinermut akiliut 25 koruunit aamma nalinginnaasumik innaallagissamut akigitinneqartoq (1,63 kr./kWh-mut) orsiinermut ataatsimut.

Nuummi misiliilluni suliniummut siunertarineqarpoq misissussallugu qanoq iliornikkut kikkut tamarmik biilinik innaallagiartortunik immiinissamut periarfissinneqarnissaat. Tamatumani piumasaqaataavoq innuttaasut inissiarsuarni najugaqartut ikkuffimmik biiliminnik innaallagiartortunik immiinissaminnut periarfissinneqarnissaat.

Nukissiorfinnut pingaaruteqarpoq misiliilluni suliniummit ingerlatsinermut misilittagaqalernissaq. Misilittakkat aallaavigalugit nalilerneqarpoq assingusunik illoqarfinni imermik nukissiuuteqarfiusuni aallartitsisoqassanersoq.

Akigitinneqartut nutaat ullumimiit aallartittumik atuutilissapput piffissap misileraaffiusup naanissaata tungaanut, tassa imaappoq 2017-ip naanerata tungaanut. Immiisarfiit napparneqarsimapput makku eqqaanni Tuapannguit, Igimaq aamma Suloraq.

Tamatuma saniatigut innersuussutigineqarput Innaallagissamik Immiisarfinnit Nioqquteqarnermut Tunisinermullu piumasaqaatit atuukkallartut (nutarterneqartut).

Attaveqarfissaq
Apeqqutissaqaruit imaluunniit suliniummut peqataaniarlutit soqutiginnikkuit teknikkeqarnermut pisortaq Mogens Nielsen attaveqarfigisinnaavat telefon 34 95 40 imaluunniit e-mailikkut lg.ti1542699467ifroi1542699467ssiku1542699467n@ino1542699467m1542699467