Naammassinermi angusapajua: A!

Jens-Christian Jacobsen manna imminut allaffimmiutut taasinnaalerpoq. TNI-p iluani Allaffissornermik ilinniagaq naammassivaa karaktereralugu A kusantarik.

Ukiut pingasut ingerlaneranni Nukissiorfiit Jens-Christiaap ineriartornera qanimut malinnaaffigisimavaat, tassami taanna qullersaqarfiup allattoqarfiani ilinniartutut sulivoq. Akiligassanut, akiitsunut, akissarsianullu tunngasut atuisunullu sullissinerit aallussimavai.
– Naammagisimaangaakkatsinnik Jens-Christiaap tamakku tamaasa ingerlaannaq ilikkarpai, inuuvoq nuannaartoq taamaammallu aamma suleqatiminit nuannarineqarluartoq. Inuttut ineriartornera aamma malinnaaffigaarput, maaniinnerminimi siullermeerluni ataatanngorpoq, namminersortortutullu suliffiutitaarnera aamma malinnaaffigaarput, maqaasinassaqaarlu, Pavia Holm oqaluttuarpoq.

Ulapporissoq

Jens-Christian Jacobsen ilinniartutut sulilluarsimavoq, taassumali saniatigut nammineq suliffeqarfimmik aallarnisaasimalluni. Taamaammallu Nukissiorfiit uterfigeqqinnissaat ilimagivallaanngilaa, ukkassinerami allarluinnarmiippoq.
– Nukissiorfiit suliffitsialassuupput, suleqatillu nuannaarlutillu qiimasuullutik. Taamaammallu ilinniarnera soorlu pinnguarnerinnapajaajusimasoq sisuuinnarluni ingerlasoq. Maannali suliffeqarfiutitaara aalluttussanngorpara, alliartuaartikkusoqaarami, Jens-Christiaat oqaluttuarpoq.

Taamaattorli ilinniartutut uteqqinnissani tunuarsimaarfiginngilaa.
– Siunissami pisiniartartutut ilinniarusussinnaavunga. Taamaattoqassappat nalunngilara sumi ilinniartutut sulerusunnerlunga, tassalu Nukissiorfinni, Jens-Christiaat oqarpoq.

Jens-Christian Jacobsenip inaarutaasumik suliaqarnermini Nukissiorfinni sulisut naammagisimaarinninnerannik misissuitsisimaneq sammisimavaa, suliaalu nalilerneqarpoq A-mik.

Nukissiorfiit Jens-Christian Jacobsen naammassinerani pilluaqquaat, suliffiutitaavanilu ingerlalluarnissaanik kissaallugu.