Sooq Nukissiorfiit?

Svend Hardenberg, 37-nik ukiulik, Nukissiornermut pisortaq
1999-imi cand. merc-itut naammassivoq, maajillu aallaqqaataani 2006 Nukissiorfinni atorfeqalerluni.

- Nukissiorfiit toqqarsimavakka suliffeqarfiup inuiaqatigiillu periarfissai takusinnaagakkit. Uuliamik eqqussisarneq pisariaqarteqaarput, tamannalu iliuuseqarfigisariaqarparput. Nukissiuutaasinnaasunik atorneqanngitsunik periarfissarpassuaqarpugut imeqarluarluta erngup nukiliornermut atorneqarsinnaasumik, tamakkunatigullu ineriartortitsineq peqataaffigerusuppara. Erngup nukiliorfinnik amerlanerusunik pilersitsisariaqarpugut uuliamik pisiniartariaqarnerput annikillisarniarlugu, taassumalu saniatigut nukissamik sinneqartoorut brintiliaralugu nunatta sinnerani immaqalu nunarsuup ilaanni atorneqarsinnaalersillugu. Aningaasaqarnermut ilinniarsimavunga pilersaarusiornermik aaqqissuussinermillu immikkut ilisimatusarsimallunga, tamannalu atorluareerparput – sullerinnerulerumalluta aaqqissuuseqqereersimavugut pisariillisaallutalu. Sanaartugassarpassuit annertuut suliaraagut, teknologi nutaaq allarpassuillu sulinitsinni atulerpavut nunatsinni pitsanngorsaallutalu akikillisaanitsinni – ullut pissanganartut unamminartorpasuillu nalaaniippugut – qiimallutillu piumassuseqaruit imaassinnaavoq ilinnut soqutiginartugut, akerlianillu!

Søren Pedersen, 43-nik ukiulik, Qorlortorsuarmi Ingerlatsinermut pisortaq
Elinstallatøritut ilinniarsimasoq 1992-imi Nukissiorfinni atorfinittoq siullermik kiassaateqarfinni teknikeritut atorfeqarluni. 1994-imi liniemesterinngorpoq, 2004-miillu Qorlortorsuarmi, Qorlortorsuarmi Erngup nukiliorfimmiit illoqarfinnik Qaqortumik Narsamillu nukimmik pilersuisumi ingerlatsinermut pisortanngorluni.

- Pissutsit nutaaliat atulersimavagut sorpassuarnik qarasaasiatigut aqutsiffiulersimasut. Taamaammat suliassanut allanut piffissaqarnerulersimavugut, tassani suleqatigiinneq ilinniaqqillunilu pikkorissarnerit qitiulersimallutik. Sinerissami nukissiornermik kiffartuussivinni atorfeqassagaanni teknikkikkut ilinniagaqartuunerup saniatigut merkonom-imut HR-imiluunniit ilinniarsimasuunissaq iluaqutaavoq. Ingerlalersitsisinnaarusukkuit motoorillu ingerlatissinnaallugit imaluunniit allaffissornikkut suliassat suliarerusukkukkit taava Nukissiorfiit tassaapput suliffeqarfik pissanganartunik unammisassarpassualik.