Center for Arktisk Teknologi (ARTEK) Nukissiorfiillu ukioq 2006-mi suliniut ”Sarfannguaq – nunaqarfik naaralaartitsivilik ” (nutaalinik katersuiffik) suleqatigiiffigilerpaat.

Sisimiut pigisaani nunaqarfiup Sarfannguup teknikkeqarnerup tungaatigut siuarsarnissaa suliniutip siunertaraa. Issittumi inginørinngorniarlutik ilinniartut ARTEK-imiit tassani annerusumik peqataapput.

Piujuartussamik nukissiuutinik nalunaarsuinermi uuttuutinik ikkussuinissaq suliami pingaarnerpaavoq
siulleq. Tamanna aasaanerani 2006-mi suliarineqarpoq.

Anorip sakkortussusaa suminngaaneerneralu uuttuisarfimmi 10 miiterinik portutigisumiit uuttorneqartarpoq. Tamanna anorip anorisaatinnguamik ingerlatsisinnaanera misissorniarlugu ingerlanneqartarpoq.

Uuttuisarfimmi seqernup qinngornerisa sakkortussusiat aamma uuttortarneqartarpoq. Seqernup qinngornerinik tigooraavimmik pilersitsisoqarsinnaaneranik misissuiniarluni tamanna ingerlanneqartarpoq.

Nunaqarfiup tasiata ernga aamma uuttortarneqartarpoq, imeq atorlugu nukiliorfeeqqamik pilersitsisoqarsinnaanera paasiniarlugu. Tamanna tatsip erngata naqitsineranik misissuinermi pisarpoq, erngullu tatsimiit kuunnera aammattaaq uuttuutinnguamik ikkussinikkut misissorneqartarluni.

Alloriarnerup tullerissavaa nukimmik atuinerup annertussusia uuttussallugu, innaallagissiorfiup tunisassiornera piinnarnagu Sarfannguani innuttaasut atuinerat ilanngullugu. Suliniutip assinganik naak annikinnerugaluartumik Uummannap kommuuniani aamma suliniartoqarpoq.