Nunap kissaa atorlugu nukissiorneq
Ukiut kingulliit ingerlanerini Nuummi qaarsup kissaa atorlugu kiassaatinik marlunnik ikkussuineq aallartinneqarpoq. Julemærkekollegiami kiassaat ataaseq, Kultureqarnermut, Ilinniartitaanermut, Ilisimatusarnermut Ilageeqarnermullu Aqutsisoqarfimmit inniminnerneqarsimasoq ataaserlu Nukissiorfiit qullersaqarfianni. Aammattaaq Nuup eqqaani qaarsup iluata kissaata atorneqarsinnaanera pillugu ilisimasaqarnerulernissaq siunertaralugu kissamik pissarsisinnaanermik uuttortaasoqarsimavoq. Nunatsinni qaarsup kissaanik tigooqqaassutinik ikkussuinermik suliaqarnikkut misilittagaqartoqariinngimmat suliffeqarfiit Sverigemeersut arlallit ikkussuinermik naammassinninnissamut ikiortigineqarput. Swego pilersaarummi misissueqqaarnernik ataqatigiissaarisuuvoq sanaartukkanillu uuttortaasuulluni.
Nalunaarusiami tassani siunissami Nuummi qaarsup kissaa atorlugu kiassaatinik pisiortornissamut ikkussuinissamullu atatillugu siunnersuinissaq ilitsersuinissarlu siunertaavoq.
Siusinnerusukkut ikkussuinernut taakkununnga marluusunut misissueqqaarnerni paasissutissat katersorneqartut Nuup eqqaani qaarsup kissaanik tigooqqaassutinik ikkussuinissamut qaarsup qanoq ittuussusiatigut teknikikkullu tunngavissatut atorneqassapput. Nalunaarusiami matumani aallarniutigalugu Nuummi nunap kissaa atorlugu nukissiornissamut nunami ikkattumik qillerinissamut teknikikkut tunngavissat allaaserineqarput tamatumalu kingorna Nuummi kissamik pissarsisinnaanermik misissuinerup inerneri eqikkaavigineqarlutik. Tamatuma kingorna qaarsup kissaanik tigooqqaassutit qanoq annertussuseqarnissaannik ilitsersuisoqarpoq, siunnersuuteqartoqarluni kiisalu qaarsup kissaanik tigooqqaavinnut kissamillu tigooqqaassutinut qillerinissamut piumasaqaatinik qimerluuisoqarluni.
Nalunaarusiaq allakkiassamut missingiutaavoq qillerinermik isumaginnittunut, pisortanut oqartussaasunut nunaminertanillu piginnittunut iluaqutaasinnaasumik ilitsersuinissamut aallaavittut atorneqarsinnaalluni, Sverigemi ”Normbrunn -07” assigalugu.
