Periarfissaalluartoq
Nukimmik pilersuinerup Nukissiorfimmeersup 60 %-ia erngup nukinganeersuuvoq. Sermersuaq nunarsuarmi imeqarfiit annersat tullersaraat erngullu nukinganik innaallagissiornissamut naleqqulluarluni. Kalaallit Nunaannut periarfissaq ima angitigaaq Europap 70 %-ia innaallagissamik pilersorsinnaallugu, Rusland Tyrkialu pinnagit. Sumiiffiilli taakku ilarpassui maanna aningaasaqarnikkut imminnut napatissinnaanngillat.
Pitsaasumik aningaasaqarneq
Kalaallit Nunaanni najugaqariaatsit nunarujussuarmi siammarsimasunik illoqarfeerarpassuaqarfiusut pissutigalugit sumiiffinni tamani erngup nukinga pisariitsumik atorluassallugu ilungersunarpoq. Sumiiffimmi atuisut aalajangersimasumik amerlassusillit atuisuusariaqarput erngup nukinganik innaallagissiorfimmut annerusumik aningaasaliinissap isumaliutigineqarnissaa illersorsinnaassappat, periarfissap suliffissuaqarnermut nukissamik pisariaqartitsiviusumut atorneqarnissaa eqqaassanngikkaanni. Erngup nukinganik innaallagissiorfiliornermi aningaasaleerujussuartoqarnissaa pisariaqarpoq, innaallagissiorfimmik nalinginnaasumik dieselitortumik sananermit annerujussuarmik.
Erngup nukinganik innaallagissiorfiliornissamut tunngavissaqarpat tamanna inuiaqatigiinnut siunissami qularnaatsumik aningaasaliinerusarpoq. Teknik ilisimaneqarluarpoq qularnaallunilu, tamatumunngalu peqatigitillugu erngup nukinganik innaallagissiorfik ingerlatsinikkut akikinnerujussuuvoq sivisunerujussuarmillu atasinnaalluni, innaallagissiorfimmut nalinginnaasumut sanilliullugu. Naggataatigut siunissami nukissamik pilersuinissamut sipaarutaassaaq. Nunatsinni innaallagissiorfik imminut akilertarpoq ukiut 15-20-t qaangiukkaangata.
Nukissiorfiit aningaasalersuivoq
Ullumikkut Nukissiorfiit erngup nukinganik innaallagissiorfinnik sisamanik ingerlataqarput illoqarfinnut tallimanut nukissamik minguitsumik avatangiisinut pitsaasumik pilersuiffiusunik – Nuuk, Tasiilaq, Qaqortoq, Narsaq aamma Sisimiut. Erngup nukinganik innaallagissiorfiit tallimassaat Ilulissani sananeqaleruttorpoq 2013-milu tunisassiulissalluni. Nunatsinni erngup nukinganik innaallagissiorfiit amerlanerunissaat sulissutigineqarpoq.
