Brint (H₂) tassaavoq pinngoqqaanit (grundstof) oqinnersaallunilu mikinerpaaq aammalu avataarsuani nunarsuatsinnilu nalinginnaanerpaalluni. Brintimmiuna seqineq ”ikumatilersaaraa”. Brint nammineerluni nunarsuup sananeqaataani ikummatissat assigalugit nukissamik pilersitsineq ajorpoq, akerlianilli nukissamik aqqutaalluni. Ikummatissanik nunap sananeqaataaneersunit atuinermut naleqqiullugu brintimik atuineq mingutsitsisuunngilaq. Tamannali aatsaat pisinnaasarpoq brintimik ikummatissiorneq nukik piujuartoq atorlugu pilersinneqarsimagaangat.

Nukissamik piujuartussamik toqqorsinermi brint atorneqarsinnaavoq, seqinninngikkaluartoq anoreqanngikkaluartoq nukissaqaannassagaanni. Brintilu taamaalilluni batteriitut atorneqarsinnaavoq. Taamaalinerani brint innaallagissiornermi imaluunniit assartuinermi ikummatissatut allatulluunniit nukissatut atorneqarsinnaasarpoq.

Kalaallit Nunaanni brintiliorfik siullersaat
Nukissiorfiit Kalaallit Nunaanni siullerpaamik brintiliorfimmik pilersitsipput, brintiliornermut brintimillu atuinermut atugassamik. Nukissiorfiit Nuup kujataani Kangerluarsunnguami erngup nukinganik innaallagissiorfimmit naammassisinnaasat sinnerisa brintiliornermut atorluarneqarnissaannut periarfissat misilerarusuppaat.

Brintiliorfeqarnikkut suliffeqarfik brintimik nukissiuutitut tunisassiornermik atuinermillu misilittagaqalissaaq. Taanna aamma takutitsissutaassaaq innuttaasut brintimik ikummatissanillu nukissamik katersuiviusumik ilisimanninnerulissutigisassaat.

Takutitsissummiipput elektrolyseanlæg, brintimik toqqortuiffik ikummatissaasivillu. Sanaartugaq nuunneqarsinnaavoq taamaalillunilu containerimut inissinneqarluni. Sanaartugaq aaqqissuussinermi 22. marts 2010-mi atoqqaartinneqarpoq.

Aamma atuakkit:
Kalaallit Nunaanni brintiliorfiit siullersaat atoqqaartinneqarpoq  
Paasissutissat

Filmi
Asseq ataaniittoq toorlugu titartakkamik filmiliaq naatsoq ”Brint - Siunissami nukissiuutissaq” takusinnaavat, taannalu pilersinneqarpoq Savalimmiuni Jardfeingi, Ilinniusiorfik kiisalu Nukissiorfiit suleqatigiinnerisigut. Filmiliaq kalaallisut qallunaatullu takuneqarsinnaavoq.