Ataavartumik nukissiorneq sunaava?
Ataavartumik nukissiorneq nukissiuutinut nungunneq ajortunut ataatsimut taaguutaavoq. Pisuussutit ataavartut atorlugit nukissiornermi silaannarmut CO2-mik aniatitsisoqarneq ajorpoq.
Ataavartumik nukissiorfiusinnaasut tassaapput:
▪ Seqerngup nukinga (solceller aamma seqerngup kissaa)
▪ Anorip nukinga
▪ Erngup nukinga
▪ Bioenergi
▪ Imaanit nukissaq (ulittarnerani mallimiillu nukissiorneq)
▪ Kissamit nunameersumik nukissaq
Qanoq iliorpugut?
Nukissiorfiit ataavartumik nukissiornermik sammisaqartorujussuusimavoq. Pingaartumik ukiuni kingullerni erngup nukinganik innaallagissiornermi ineriartortitsisoqangaatsiarpoq. Ullumikkut Nukissiorfiit erngup nukinganik innaallagissiorfinnik sisamanik ingerlataqarput illoqarfinnut tallimanut nukissamik minguitsumik avatangiisinut pitsaasumik pilersuiffiusunik – Nuuk, Tasiilaq, Qaqortoq, Narsaq aamma Sisimiut. Erngup nukinganik innaallagissiorfiit tallimassaat Ilulissani sananeqaleruttorpoq 2013-milu tunisassiulissalluni. Nunatsinni erngup nukinganik innaallagissiorfiit amerlanerunissaat sulissutigineqarpoq.
Siunissami teknologi
Nunatsinni erngup nukinganut aalajaatsumik periarfissarujussuit pissutigalugit tamanna ataavartumik nukissiuutissatut naleqqunnerpaavoq. Teknologi ilisimaneqarluarpoq nukissamillu aalajaatsumik pilersuiffiulluni, siunissami aamma immaqa brintiliornermut atorneqarsinnaalluni.
Aammattaaq Nunatsinni ataavartumik nukissiorfiusinnaasut allarpassuit atorneqarnissaannut periarfissaqarpoq, soorlu assersuutigalugu seqineq, anori aamma kissaq nunameersoq. Teknologiit tamakku erngup nukinganut ilassutitut atussallugit soqutiginarput. Tamatuma saniatigut nukissamik brintimut batteriinullu toqqorterineq nunaqarfinnut isorliunerusunullu soqutiginassaaq, tassami nukissaq minguitsoq ungasissorsuarmut assartorneqarsinnaammat taamaalillunilu innaallagissiorfitoqqanut dieselitortunut taarsiutigalugu.
Ataavartumik nukissiornermi, brintimi kissamillu tigooraavinni teknologi nunarsuarmi ineriartortinneqartuarpoq. Teknologiioreersup maani nunatsinni qanoq atorneqarsinnaanera ilisimalissallugu suliassaraarput. Taamaattumik Nukissiorfiit siunissami ataavartumik nukissiornermik atuinermi periarfissat pillugit ilisimasaqalernissamut suleqatigiinnikkut suliassani arlalinni peqataapput.
