Nunarsuarmi nunap iluanit ikummatissat – tassalu aamarsuit, uulia aamma gas – ilajartornerat killeqarpoq. Taamaammat inuit amerliartuinnartillugit nukissamillu pisariaqartitsinerup annertusiartornera peqqutigalugit isumalluutit sukkasuumik nungukkiartuaarput. Taamaattumik ikummatissat tamakku siunissami allanik taarsernissaat pisariaqarpoq.

Ikummatissat tamakku ikumatittarnerini akuutissat avatangiisinut navianaatillit aamma aniatinneqartarput. Kvælstoffit (NO aamma NO₂, ataatsimut taaneqartartut NOx) aamma svovldioxid (SO₂) nassatarisarpaat pinngortitamik ”seernartitsinermik” nassataqarput. Ikumatitsinermi kuldioxid (CO₂) pilersinneqartarpoq, tamannalu peqqutaaqataalluni kissarneq uninngaannarnerulersarpoq, taamaalillunilu nunarsuaq kissakkiartuinnarluni.

Akuutissat avatangiisinut navianaatillit aniatinneri annikillisinneqarsinnaapput, teknikki sunniuteqarnerusoq avatangiisinullu mianersuussinerusoq atorlugu ikumatikkaanni. Ikummatissalli tamakkiisumik ilaannakortumilluunniit aamma taarserniarneqarsinnaapput nukissiuutit ataavartut atornerisigut, soorlu brint imaluunniit kissartumik supoorutit (varmepumper).