Innaallagiaq, imeq kiallu, qatserisartoqarneq, umiarsualiviit, aqqusernit, nalunaarasuaatikkut atassuteqarneq il.il. pillugit Kalaallit Nunaannut inatsimmi nr. 943-mi 23. december 1986-imeersumi §§ 1, 4 aamma 13 naapertorlugit aalaj angersarneqarput:

Kapitali 1.
Atortuuffia.
§ 1. Inatsisartut peqqussutaatigut matumuuna aalajangersarneqarput innaallagissiornermi, innaallagissamik agguaassinermi atuinermilu isumannaallisaanermut tunngasut piumasarisallu, tamatumunnga aamma ilanngullugu atortunik pilersuutinillu atuineq.
Imm. 2. Peqqussut atorneqassanngilaq
1) nunap ilaani illersornissaq siunertaralugu atorneqartuni kiisalu
2) Danskit Amerikamiullu sakkutooqarfiini, Kalaallit Nunaata illersorneqarnissaa pillugu 27. august 1951-imi isumaqatigiissut naapertorlugu pilersinneqarsimasuni, taamaattorli takuuk inatsimmi nr. 943-mi 23. december 1986-imeersumi § 9.

Nassuiaatit.
§ 2. Sanaartukkat innaallagissamut sakkortuumut atugassat tassaapput innaallagissamik pilersuinermut atortut, innaallagissamik atortulersuutinut atortunullu allanut tamanut atassusersugaasut, sarfaat innaallagiaalluunniit iraa sakkortutigisoq navianartorsiortitsilersinnaalluni. Innaallagissamik pilersuinermut atortut tassaapput sanaartukkat innaallagissiornermut, innaallagissamik ingerlaartitsinermut agguaassinermullu atorneqartussat. Atortut innaallagiatortut pilersuutillu tassaapput maskiinat, sakkuutit, atortut pilersuutillu suusulluunniit, sanaartukkani innaallagissamut sakkortuumut atukkani ilaatinneqartut ilaatinneqartussatulluunniit naatsorsuussaasut.

Kapitali 2.
Peqqussutip atortinneqarnera.

§ 3. Nukissiorfiit peqqussutip atortinneqarnera pisortaaffigaat.
Imm. 2. Nukissiorfiit:
1) Innaallagissamut tunngasunik isumannaalisaasarneq malinnaaffigissavaat,
2) Teknikkimut tunngasutigut ineriartorneq malinnaaffigissavaat,
3) Atuinermut tunngasut malinnaaffigissavaat,
4) Peqqussut manna najoqqutaralugu maleruagassaliortassapput.
5) Peqqussut manna najoqqutaralugu nakkutilliineq misissuisarnerlu isumagissavaat.
6) Innaallagissamut tunngasut isumannaallisaaffigineqartarnerat ilitsersuussutigisassavaat.
7) Atortunik innaallagiatortunik nioqquteqarneq nakkutilleeqataaffigissavaat.

§ 4. Nukissiorfiit aalajangiineri Namminersornerullutik Oqartussanut suliassanngortinneqarsinnaapput.

Imm. 2. Naammagittaalliuutip pilertortumik aalajangiiffigineqarnissaanut imaluunniit innaallagissamut tunngasunik immikkut ittunik pissutissaqarpat Naalakkersuisut naammagittaalliut immikkut ataatsimiititaliaagallartumut aalajangiiffigitissinnaavaat. Ataatsimiititaliamut tassunga ilaasortaassapput Kalaallit Nunaanni Sulisitsisut Peqatigiiffiannit toqqagaq ataaseq, Elinstallatųrit Kattuffiata Kalaallit Nunaanni immikkoortoqarfianit toqqagaq ataaseq, Teknikkikkut Siunnersuisoqatigiit Peqatigiiffiannit toqqagaq ataaseq, Ineqartut Peqatigiiffiisa Kattuffiannit toqqagaq ataaseq aamma siulittaasoq Naalakkersuisunit toqqagaq.

Kapitali 3.
Innaallagissamut tunngasutigut isimannaatsuuneq.

§ 5. Naalakkersuisut makku pillugit aalajangersagaliussapput:
1) Peqqussutip atortinneqarnera.
2) Sanaartukkanik innaallagissamut sakkortuumut atorneqartunik atortunillu innaallagiatortunik nakkutilliineq misissuisarnerlu.
3) Atortunik innaallagiatortunik misiliisarneq atorsinnaanerannillu uppernarsaasiisarneq.

§ 6. Nukissiorfiit Naalakkersuisut akuersereernerisigut innaallagissamut tunngasutigut isumannaatsuunissaq makkununnga tunngatillugu aalajangersagaliussapput:
1) Sanaartugassat innaallagissamut sakkortuumut atugassat sananeri ingerlatinnerilu, tamakkununnga ilanngullugit innaallagissiorneq, innaallagissamik ingerlaartitsineq agguaassinerlu.
2) Innaallagissamik pilersuinermut atortut atortullu innaallagiatortut.
3) Sanaartukkat innaallagissamut sakkortuumut atorneqartut eqqaanni imaluunniit tamakkununnga atatillugit sanaartugassat allat sananeri ingerlatinnerilu.

Imm. 2. Nukissiorfiit innaallagissamut tunngasutigut isumannaatsuunissamut aalajangersakkat immikkut aalajangiiffigisinnaavaat.

Imm. 3. Nukissiorfiit isumannaatsuunissaq pillugu immikkut piumasaqarsinnaapput innaallagissamut tunngasutigut isumannaatsuunissaq pillugu aalajangersakkanit aallaassuteqartunik, piumasarisinnaallugulu sanaartukkat innaallagissamut sakkortuumut atugassat atortullu innaallagiatortut pillugit immikkut nalunaaqqutsiinissaq imaluunniit immikkut ilitsersuinissaq.

Imm. 4. Nukissiorfiit sanaartukkat innaallagissamut sakkortuumut atorneqartut atortullu innaallagiatortut ilaat innaallagissamut tunngasutigut isumannaatsuunissaq pillugu aalajangersakkanik atuinngitsoortissinnaavaat.

§ 7. Innaallagissamut tunngasutigut isumannaatsuunissaq pillugu Nukissiorfiit aalajangersagaat inuiaqatigiinnut annertuumik aningaasartuutaalersinnaasut imaluunniit inuit ilarpassuisa innaallagissamik atuinerannik annertuumik allanngortitsisussat Naalakkersuisunit akuerineqaqqaartassapput.

Kapitali 4.
Misissuisarneq nakkutilliinerlu

§ 8. Nukissiorfiit sanaartukkat atortullu innaallagiatortut misissortassavaat nakkutigalugillu §§ 5 aamma 6 naapertorlugit.

Imm. 2. Nukissiorfiit innaallagissap aqqutaani sulisinnaanermut akuersissutit malittarisassaat saneqqunnagit pisortat suliffeqarfiutaat suliffiutaallu, suliffiit namminersortut, innaallagissamik pilersuiffiit inuillu ataasiakkaat piginnaatissinnaavaat nakkutilliinissamut misissuisarnissamullu.

§ 9. Nukissiorfiit atortunik innaallagissamik sakkortuumik atuisunik piginnittoq atuisorluunniit peqqusinnaavaat atortut tamakku namminneq akilikkaminnik misissorteqqullugit.

Imm. 2. Nukissiorfiit killissaliisinnaapput atortuni tamakkunani ajoqutit amigaatilluunniit misissorneqarnissaannut iluarsineqarnissaannullu.

Imm. 3. Atortunik innaallagissamik sakkortuumik atuisunik innaallagissamut tunngasutigut isumannaatsuunissaq pillugu aalajangersakkanik eqqortitsinngitsunik atuinissaq inerteqqutigisinnaavaat.

Imm. 4. Nukissiorfiit innaallagissamut atortulersuutinut innaallagissamik pilersuineq kipitissinnaavaat imaluunniit innaallagissamik pilersuiffimmut piumasarisinnaallugu innaallagissamut atortulersuutinut pineqartunut pilersuineq kipiteqqullugu.

§ 10. Nukissiorfiit aalajangersagaliorsinnaapput atortut innaallagiatortut nioqqutigineqaleraangata, tunniunneqaraangata imaluunniit ikkussorneqaraangata paasissutissiortarnissaq pillugu.

Imm. 2. Nukissiorfiit atortut innaallagiatortut innaallagissamut tunngasutigut isumannaatsuunissaq pillugu aalajangersakkanik eqqortitsinngitsut avammut nioqqutaanissaat, tunineqartarnissaat, tunniunneqarnissaat ikkussorneqarnissaallu inerteqqutigisinnaavaat.

Imm. 3. Atortunik innaallagiatortunik imm. 2-mi pineqartunik tuniniaasoqartalerpat, tunniussisoqartalerpat, ikkussuisoqartalerpalluunniit inerteqqutip tamanut tusagassiarineqarnissaa Nukissiorfiit piumasarisinnaavaat.

Imm. 4. Nukissiorfiit piumasarisinnaavaat atortunik innaallagiatortunik nioqqutillit nunanillu allanit tikisitsisartut atortumik imm. 2 malillugu inerteqqutaasunut ilaasumik utertitseqqullugit.

Imm. 5. Nukissiorfiit nioqqutilinnut, sanaartortartunut tikisitsisartunullu piumasarisinnaavaat atortup innaallagiatortup innaallagissamut tunngasutigut isumannaatsuunissaq pillugu aalajangersakkanut aalajangersakkanullu allanut naapertuuttuuneranut paasissutigissallugit pisariaqartunik tunniussaqaqqullugit.

§ 11. Atortunik innaallagiatortunik piginnittut, atuisut, sanaartortartut, nunanit allanit tikisitsisartut nioqquteqartartullu paasissutissat nakkutilliinerup naammattumik ingerlannissaanut pisariaqartutut Nukissiorfiit isigisaat tamaasa nalunaarutigisassavaat.

Imm. 2. Nukissiorfiit imaluunniit inuit Nukissiorfinnit piginnaatinneqartut kinaassutsiminnut uppernarsaammik takutitaqarlutik eqqartuussinertaqanngitsumillu sukkulluunniit pisinnaatitaassapput innaallagissamik sakkortuumik atuiffinnut tamanut kiisalu ininut, atortunik innaallagiatortunik sanaartorfiusunut, nioqquteqarfiusunut, toqqorsiviusunut imaluunniit atuisoqarfiusunut isernissaminnut.

Imm. 3. Kinaassutsimut uppernarsaat Nukissiorfinnit suliarineqassaaq.

§ 12. §§ 9-11 malillugit nakkutilliinermut misissuinermullu atasumik aningaasartuutit akilerneqarnissaannik Nukissiorfiit malittarisassiaat Naalakkersuisut akuereqqaassavaat.

Kapitali 5.
Misiliineq atorsinnaanermillu uppernarsaasiineq

§ 13. Nukissiorfiit atortunik innaallagiatortunik misiliisarneq atorsinnaanerannillu uppernarsaasiisarneq pillugit aalajangersagaliussapput.

Imm. 2. Misiliinermik atorsinnaanermillu uppernarsaasiinissamik akuerisamik atuinissaq Nukissiorfiit peqqussutigisinnaavaat.

Imm. 3. Misiliinermut atorsinnaanermilluunniit uppernarsaasiinermut piumasarineqartumut atasumik aningaasartuutit akilerneqarnissaannik Nukissiorfiit malittarisassiaat Naalakkersuisut akuereqqaassavaat.

Kapitali 6.
Innaallagissamut sakkortuimut atortunik sanaartorneq ingerlatsinerlu

§ 14. Innaallagissamut sakkortuumut atortut sananeqartassapput ingerlanneqartassallutillu Inatsisartut peqqussutaanni uani aalajangersakkat naapertorlugit.

§ 15. Innaallagissamik pilersuiffimmik sanatitsisoq ingerlatitsisuusussarlu tamarmik pilersuinermut aqqusersuutinut atassusiinissamut atuisunullu pilersuinissamut isumannaallisaanissamut piumasaqarsinnaanngillat Inatsisartut peqqussutaat una naapertorlugu aalajangersarneqarsimasunit sakkortunerusunik.

Kapitali 7.
Taarsiinissamut akisussaaneq

§ 16. Innaallagissamik pilersuiffimmik ingerlatitsisoq taarsiisussaavoq inuup pigisalluunniit ajoqusernerannut, pilersuiffimmik pissuteqartunut, taarsiisussaassananili uppernarsarneqarpat ajoquserneq ajoqusertup nammineq piaaraluneerneratigut mianersuaalliorneratigulluunniit pisimasoq, imaluunniit ajoquserneq pinngitsoortinneqarsinnaasimanngitsoq sissuernikkut mianersornikkullu innaallagissamik pilersuiffiup ingerlatitaanerani piumasarineqartutigut.

Imm. 2. Ajoquserneq innaallagissamik pilersuiffiit arlallit pissuussutigisinnaappassuk taakkuninnga ingerlatsisut tamarmik, pisuussutiginngisamittut uppernarsarneqarsinnaanngitsunut, ajoquserneqartumut taarseeqatigiissapput. Pilersuiffinnik ajoqusiisunik ingerlatsisut allamik isumaqatigiissuteqanngippat tamarmik assigiimmik annertussusilimmik taarsiinermi akiliuteqassapput.

Kapitali 8.
Arsaarinnissuteqarneq

§ 17. Naalakkersuisut pigisanik aalaakkaasunik arsaarinnissuteqartarneq pillugu Inatsisartut inatsisaanni malittarisassat malillugit arsaarinninnissamik aalajangersinnaapput, tamanna pisariaqarpat innaallagissiornermut, innaallagissamik ingerlaartitsinermut agguaassinermullu atugassamik sanatitsinissami.

Kapitali 9.
Aalajangersakkat assigiinngitsut.
§ 18. Kapitalini 3-mi 4-milu malittarisassat malillugit suliassanik isumaginnittut tamarmik kiisalu tamakkununnga ikiuuttut kikkulluunniit allanut tusarliussisussaatitaanngillat.

Imm. 2. Kialuunniit kapitali 4-mi malittarisassat malillugit suliassanik isumaginnittup innaallagissamik atortulersuutinik piginnittoq atuisorluunniit ilisimatitassarinngilaa naammagittaalliuummik pissuteqartumik takusaasoqarnersoq. Tamanna taamattaaq atortuuvoq atortunik elektricititortunik nioqquteqartunik sanaartortunilluunniit nakkutilliinermi kiisalu innaallagissamik pilersuiffimmik misissuinermi.

§ 19. Naalakkersuisut Innaallagissamik nioqqusiortunut, nunanit allanit tikisitsisartunut agguaassisartunullu Nukissiorfiit Inatsisartut peqqussutaat una naapertorlugu suliassanik suliaqarneranni aningaasartuutinut matusissutissanik akiliuteqartitaasarnissaat pillugu aalajangersagaliorsinnaapput, aningaasartuutit tamakku akiliutit isertitallu allat tamakkerlugit matusinnaanngikkaangatigik. Akiliutit annertussusissaat ukiumoortumik aningaasanut inatsisini aalajangerneqartassapput.

Kapitali 10.
Unioqqutitsinerit

§ 20. §§ 6, 8-11, 13-14 18-imillu unioqqutitsinernut akiliisitsisoqarsinnaavoq.

Imm. 2. Peqqussut una naapertorlugu malittarisassiani aalajangerneqarsinnaavoq unioqqutitsineq akiliisitsissutaasinnaasoq.

Imm. 3. Unioqqutitsineq aktiaateqarluni ingerlatseqatigiiffiup, piginneqatigiilluni ingerlatseqatigiiffiup, piginneqatigiiffiup, peqatigiiffiup, suliffeqarfiup imminut pigisup, aningaasaateqarfiup assigisaasaluunniit unioqqutitsinerippassuk inuk taakkunani inatsisilerituutut sulisoq taamatut akiliisitsissutissanut akisussaatinneqarsinnaavoq.

Imm. 4. Unioqqutitsineq Namminersornerullutik Oqartussat, naalagaaffiup, kommunip imaluunniit kommunit ataatsimoortut unioqqutitsinerippassuk Namminersornerullutik Oqartussat, naalagaaffik, kommuni imaluunniit kommunit ataatsimoortut akiliisitsissutissanut akisussaatinneqarsinnaapput.

Kapitali 11.
Atortuulerfissaa il.il.

§ 21. Inatsisartut peqqussutaat una atortuulissaaq januaarip aallaqqaataani 1995-imi.

Imm. 2. Siusinnerusukkut aalajangersakkat, kaajallaasitat assigisaallu naapertorlugit malittarisassiat atortuuinnassapput Inatsisartut peqqussutaat una naapertorlugu atorunnaarsinneqarnissamik imaluunniit aalajangersakkanik taarserneqarnissamik tungaannut.

Imm. 3. Aalajangersakkanik, imm. 2 naapertorlugu suli atortuusunik, unioqqutitsinernut § 20 naapertorlugu akiliisitsisoqarsinnaavoq.