Sanaartukkat innaallagissamut sakkortuumut atugassat atortullu innaallagiatortut pillugit Inatsisartut peqqussutaanni nr. 12-imi, 3. november 1994-imeersumi §§ 5, 6 aamma 20 naapertorlugit aalajangersarneqarput:

§ 1. Nalunaarummi pineqarpoq innaallagissamik atuisup pilersuinermut atortuinik atortuinillu allanik innaallagissamik pilersuisup sarfamik sakkukitsumik pilersuiffianut atassusiisarneq pillugu teknikkikkut aalajangersakkanik aalajangersaaneq.

Imm. 2. Innaallagissamik pilersuisut tassaapput kikkulluunniit kikkunnut tamanut innaallagissamik pilersuinissamut akuersissummik pigisaqartut allatulluunniit akuerisaasut.

Imm. 3. Nalunaarut atuutinngilaq
1) sumiiffinni sakkutooqarnikkut siunertanut atorneqartuni, kiisalu
2) danskit-amerikarmiut sakkutooqarfiini Kalaallit Nunaata illersorneqarnissaa pillugu isumaqatigiissut 27. august 1951-imeersoq naapertorlugu pilersinneqarsimasuni, taamaattorli tak. Inatsimmi nr. 943-mi 23. december 1986-imeersumi § 9.

§ 2. Danmarkimi innaallagissiorfiit peqatigiiffiata, Danske Elvęrkers Foreningip, Ataatsimut malittarisassai qaquguluunniit atuuttut Nukissiorfiit taakkununnga Tapiliussaat qaquguluunniit atuuttut ilanngullugit, innaallagissamik pilersuinermut atortunut atortunullu allanut, innaallagissamik pilersuisup pilersuisoqarfianit pilersorneqaqqullugit kissaatigineqartunut, atassusiisarnissamut malittarisassanik aalajangersaaviusut, atorneqassapput.

§ 3. Ataatsimut malittarisassanik Tapiliussanillu § 2 taaneqartunik unioqqutitsinerit akiliisitaassutaasinnaapput.

§ 4. Ataatsimut malittarisassani Tapiliussanilu kissarussap allaanerunera pillugu aalajangersakkanik unioqqutitsisoqartillugu innaallagissamik pilersuisup aalajangersinnaavaa kWh atornagu kVAh atorlugu atuineq akilerneqassasoq. kWh-mut aki atuuttoq naapertorlugu akiliisoqartassaaq.

§ 5. Nalunaarut atortuulissaaq 1. juli 1996.

Imm. 2. Tamanna peqatigalugu "Kalaallit Nunaanni innaallagissamut sakkortuumut atortut pillugit ataatsimut aalajangersakkat"-ni, atuakkap aappaani, imm. A atorunnaarsinneqarpoq.