7. maj 2010
Taseq Nukissiorfiit Upernavimmiunut imermik imigassaliornissamut pissarsiffigisartagaat maanna imaaruppoq. Imaanit imiliuut ajornartoorfimmi pilersuilersinneqarpoq.
Langeømit imeq
Imaaniilli imiliuutip illoqarfimmi pisariaqartitsineq tamaat matussusersinnaanngilaa, taamaattumik Nukissiorfiit siorartaatip Holmip Langeømi illoqarfimmit 3 kilometerisut ungasitsigisumi tatsimit imermik assartuinissamut attartorniarlugu aalajangerpoq.
Holmi maanna Nuup umiarsualivianiippoq piaartumilli avannamut aallartinneqassalluni.
Holmi sap.ak. 20-p aallartinnerani Langeømit Upernavimmut imermik assartuisinnaanngorlugu Upernavimmi inississangatinneqarpoq.
Umiarsuaq tankimini imermik 200 kubikmeterinik imaqarsinnaavoq. Imeq Upernavimmut tunniunneqareerpat imermik suliarinniffimmi suliarineqassaaq, illoqarfimmi innuttaasunut tunniussuunneqannginnerani.
Tunuliaqutaasoq
2010-mi ukiup ingerlanerani Upernavimmi tatsimik imeqarfiusumik uuttortaanerit paasinarsisissimavaat imeq aarlerinartumik annikillisimasoq. Kingusinnerusukkut uuttortaanerni paasinarsisimavoq imeq siullermik ilimagisamit sukkanerusumik nungukkiartortoq taamaattumillu imermik pilersuinermi killilersuisoqalerpoq kiisalu allatut aaqqiinissamut periarfissanik misissuisoqalerluni.
6. maj 2010-mi paasineqarpoq taseq imeqarfiusoq imaarussimasoq Upernaviullu illoqarfia maanna imaanit imiliuummik ajornartoornermi illoqarfimmut pilersuissutitut Sisimiut kujataatungaanni nunaqarfimmit Sarfannguanit Upernaviliaanneqarsimasumik taamaallaat pilersorneqalerpoq .
Inissisimaneq ajuusaarutigaarput neriullutalu Upernavimmiut paasinnikkumaartut. Soorunami ineriartorneq malinnaaffigissavarput innuttaasullu ingerlaavartumik ilisimatittassallugit.
Ima pisoqarpoq
Upernavimmi tatsimi imeqarfiusumi imissaaleqineq sioqqullugu arlalinnik ajuusaarnartunik pisoqarsimavoq maanna inissisimalernitsinnik kinguneqartunik.
Maj 2009:
Upernavimmi innaallagissiorfik imeqarfiutigisoq 29. maj 2009-mi ikuallalluni nunguppoq. Innaallagissiorfimmi imeqarfiutigisimasumi imermut tarajuunngitsumut generatoreqarpoq ajornartoornermi illoqarfimmut pilersuissutaasumik, ulloq unnuarlu imermik 60 m3-it missaannik pilersuisinnaasumik, taanna aamma ikuallannermi annaaneqarpoq.
Ikuallattumik qatserinermi imerujussuaq atorneqarpoq. Ulluni arlalinni qatserisoqarpoq.
Juni 2009:
Imermik suliarinniffiugallartumik Upernaviliaassisoqarpoq imeqarfiup nutaap sananeqareernissaata tungaanut illoqarfimmut pilersuisuusussamik. Imeqarfiugallartoq Nunami namminermi, Pinngortitamut Avatangiisinullu Naalakkersuisoqarfimmit imeqarfiup nutaap sananeqareernissaata tungaanut imermik suliarinnittut atugassatut akuerineqarpoq.
2009-mi aasaq:
Ukiup siulianut sanilliullugu 2009-mi aasami Upernavik siallinnginerujussuuvoq tamatumalu tatsip imakinnerunera kinguneraa.
August 2009:
Imermik misissuinerni imeq imigassaq bakteriaqartoq paasineqarpoq tamannalu erngup imigassap qalatsinneqaqqaartarnissaanik kaammattuisoqarnera kinguneraa. Nukissiorfiit imertartarfinnik, ruujorinik biilinillu imertaataasunik saliilerput. Sulineq tamanna 2009-mi aggustimit ukiup sinnera ingerlavoq tamatumalu aamma nalinginnaasumit imermik atuisoqarnerunera nassataraa.
Februar 2010:
Upernavimmi imermik qalatitseqqaartarnissamik kaammattuineq 2010-mi februaarimi atorunnaarsinneqarpoq. Tamanna pivoq imertartarfinnik ruujorinik taarsersuinerup, kiisalu pisariaqartumik arlalerierluni saleereernerup kingunerereernerullu kingorna.
23. februar 2010-mi imeq 2,68 meterinut uuttortarneqarpoq.
Marts 2010:
Marsip ulluisa 22-anni tatsimik imeqarfiusumik uuttortaanermi paasineqarpoq imeq 1,6 meterinut appariarsimasoq, kiisalu 0,8 meterinik issussusilimmik sikusimasoq. Sillimmatinut tabeli naapertorlugu taanna imermut 9000 m3-it missaannut naapertuuppoq. Illoqarfimmi atuineq piffissami tassani qaammammut 2.700 – 3.100 m3-it missaanniippoq.
7. april 2010:
Tatsimi imeq 1,35 meterinut sikulu 75 cm-inut uuttortarneqarput, tamannalu imermut 7000 m3-imut naapertuuppoq. Siusinnerusukkut itissusersiuinernut sanilliullugu qaammatit marluk missaanni atuinermut imeq naammattussaassagaluarpoq.
Tamatumunnga peqatigitillugu imaanit imiliuummik ajornartoornermi pilersuivittut Danmarkimit Upernaviliaassinissamut periarfissat Nukissiorfinnit misissorneqalerpoq.
12. april 2010:
Imeq 1,2 meterit missaanniippoq.
Tamanna sillimmatinut tabeli naapertorlugu taanna tatsimi imermut 5000 m3-it missaannut naapertuuppoq.
19. april 2010:
Imeq 1 meteriuvoq tatsimi imermut 2000 m3-it missaanniittumut naapertuuttoq. Tatsimi imeq kaaviiaartinneqarpoq sikutaa aatsinniarsaralugu.
26. april 2010:
Imeq 0,5 meterit missaanniippoq. Illoqarfimmi imermik pajuttuinermi killilersuisoqalerpoq oqartussallu ilisimatinneqarput, kiisalu imaanit imiliuummik minnerusumik ulloq unnuarlu 24 m3-inik imiliorsinnaasumik Sarfannguanit (Sisimiut) Upernavimmut nassiussisoqarpoq.
Imaanit imiliuut maanna membranit ajoquteqarnerat pissutigalugu affaannarmik ingerlasinnaalerpoq iluarsaannissaanullu kingoraartissat ingerlaannaq inniminnerneqarlutik.
28. april 2010:
Tatsimik imermik milluaaneq ajortilerpoq. Imaanit imiliuut ingerlanneqalerpoq illoqarfimmullu imilersuinermut iluaqutsiunneqarluni.
Oqartussat nalunaarfigineqarput sanaartukkallu akuersissutigineqarnissaa qinnutigineqarpoq.
6. maj 2010:
Taseq imaaruppoq. Illoqarfik imaanit imiliuummit imilersorneqarpoq imaaniillu imiliuummik annerusumik Upernaviliaassisoqarnissaa sulissutigineqarpoq.
7. maj 2010:
Siorartaat Holmi Langeømi illoqarfimmit 3 kilometerisut ungasitsigisumi tatsimit imermik assartuinissamut attartorneqarpoq. Siorartaat Holmi sap.ak. 20-p aallartinnerani Langeømit Upernavimmut imermik assartuisinnaanngorlugu Upernavimmi inississangatinneqarpoq.
