Ungasianit atuaassutilerinerup killiffia

Atuinermut uuttortaatitoqqat uuttortaatinik nutaanik taarsersorneqarnerat maanna Narsami, Qaqortumi Nanortalimmilu naammassivoq.

Kujataani taarsersuineq ukioq manna januaarimi aallartippoq. Illoqarfinni uuttortaatit tamaasa taarsersoreerlugit taarsersuisut maanna umiarsuaq Kisaq juulip ulluisa sisamaanni aallertussaq utaqqivaat. Suliassammi tullia tassaavoq Kujataani tamarmiusumi nunaqarfinni Arsuk ilanngullugu innaallagiamik atuinermut uuttortaatinik taarsersuinissaq.
   Pilersaarusiornermut pisortaq Kent Skildal oqaluttuarpoq uuttortaatip kingulliup ikkunneqarneranit piffissaq antenninik ikkussuinikkut uuttortaatit nassiussuinerannik pitsanngorsaanermut atorneqarsimasoq.
   - Pilersaarutit malillugit juulip ulluisa 21-anni Arsummi unnukkut naammassisimasussaavugut juulillu ulluisa 22-anni unnukkut Nuummut utersimanissarput naatsorsuutaavoq, Kent Skildal oqarpoq.

Pilersaarut naatsumik
Nukissiorfiit maanna ingerlatseqatigiiffiup aaqqissuussaanikkut suliassaanik annerpaanik suliaqarfiuvoq. Nuna tamakkerlugu innaallagiamik, imermik kissamillu atuinermut uuttortaatit 43.000-it missaanniittut nutaanik taarsersussavavut 2012-imilu naammassinissarput naatsorsuutigalugu. Taamaliornikkut Kalaallit Nunaat nunarsuarmi siullersaalluni uuttortaatit tamarmik ungasianit atuarneqarsinnaasoqarfiulissagunarpoq.

Taarsersuisut maannamut Nuummi, Sisimiuni, Uummannami Upernavimmilu taakkulu nunaqarfiini uuttortaatinik tamarmiusunik taarsersuereerput. 2010-mi Narsami, Qaqortumi, Nanortalimmi, Paamiuni Ittoqqortoormiinilu taakkulu nunaqarfiini sullitat uuttortaatiminnik taarsersuiffigineqassapput.