8. juni 2009
Nukissiorfiit taarsersuisartui 2009-mi februaarimi Sisimiunukarput atuinermik uuttortaatitoqqat uuttortaatinik nutaanik ungasianit atuarneqarsinnaasunik taarsersoriartorlugit. Uuttortaatit katillugit 3645-t taarserneqartussaasimapput. Juunip qaammataata nannginnerani tamatuma piareersimanissaa anguniagaasimavoq maannamullu ajorpasinngeqaaq.
Sisimiut illoqarfianni innaallagiamik uuttortaatit marluinnaat suli taarserneqarnissaat amigaatigineqarput, taakkunannga ataaseq Nukissiorfiit namminneq suliffeqarfimmi uuttortaatigalugit. Imermik uuttortaatinik taarsersuineq VVS-imik suliffeqarfinnit sulisitanit avataaneersunit suliarineqartoq Nuummiit pitsaanerusumik ingerlasimavoq. Taamaappoq Sisimiuni ikkussukkat pitsaanerusimammata uuttortaatillu angujuminarnerusimammata. Taamaattorli suli imermut uuttortaatit angisuut 100-t missaanniittut suli taarserneqanngillat.
Tamatumunnga pissutaavoq uuttortaatinik pissarsiffigisartakkatta Kamstrupip aatsaat qanittukkut imermik uuttortaatinik angisuunik tunisassiulersimanera.
Nunaqarfik ataasiinnaq
Nunaqarfik Sarfannguit misileraanermi 2007-imiilli uuttortaatinik taarsersuiffigineqarpoq Kangerlussuarmilu Mittarfeqarfiit tassaapput nunaqarfimmi innuttaasunut innaallagiaqartitsinermut, imeqartitsinermut kiassarnermullu akisussaasuusut. Taamaattumik taarsersuisut Sisimiuniinnerminni Itillimuinnaq ingerlaqqissapput.
- Angallammik apuunniassagatta sikup aserortilernissaa utaqqivarput. Ullumikkut taarsersuisuvut Itillimukarput ullullu ingerlanerani uuttortaatit tamaasa taarsernissaat naatsorsuutigaarput, pilersaarusiornermut siuttoq Peter Kjeldmann nalunaarpoq.
Systemimik iluarsaaneq
Maajip aallartinnerani aamma uuttortaatit iluarsaanneqarnerat aallartinneqarpoq, tassa teknikitaat atorsinnaanngortinniarlugit paasissutissat Nukissiorfinnut apuuttarniassammata. Tamanna sumiiffikkuutaartumik pivoq illoqarfik sumiiffinnut 15-inut agguataarneqarluni. Sumiiffiup ataatsip suliarinera ullut marluk missaannik sivisussuseqartarpoq. Uuttortaatinik taarsersuinertulli ukioq manna juunip ulluisa 30-anni inaarutaasumik killiliussaq nallertinnagu naammassinissaq naatsorsuutigineqarpoq.
Aggustip qaammataani taarsersuisut avannamut aallassapput Uummannami Upernavimmilu taakkulu nunaqarfiini uuttortaatinik taarsersuiartorlutik
