14. juli 2010
Sapaatit akunnerata naanerani værkstedimi piareersarneqareerlutik Nukissiorfiit biiliutaat innaallagiatortut marlunngornerup ullaavani siullermeerlutik Nuummi sulisunut takutinneqarput.
Naak sulinngiffiup naligigaluaraa amerlasuut takkussimapput, ineriartortitsinermut siunnersortit Jens Henrik Nielsen aamma Jens-Peter Bak Henriksen suliffeqarfiup biiliutitaavi innaallagiatortut marluk marlunngornerup ullaavani nalunaaqutaq qulingiluanut takutimmatigit. Aamma amerlasuut illoqarfiup ilaani misiliisinnaanertik atorluarpaat.
Nipaannera nuannersoq
- Biilit sulisunit soqutigineqaqaat aaqqissuussinerlu ajunngitsumik ingerlavoq, Jens Henrik Nielsen arlallit ingerlatsinissamut namminneq allagartaqanngitsut aamma ilaasuullutik misiliisimanerarlugit nangittoq oqaluttuarpoq.
Sulisoqarnermut siunnersorti Katrine Andersen isumalluangaarluni misiliisut ilagaat.
- Eqqumilaarpoq aammali biilip ingerlatilluni taama nipaatsiginera nuannerpoq, Katrine qungujulluni oqaluttuarpoq.
Tamanna aamma isiginnaartut maluginiarpaat. Biilip motooriata innaallagiatortup nipaatsorujussuup saniatigut taamaallaat assakaasut asfaltikkut ingerlanerat tusaaneqarsinnaavoq. Biili uninngagaangat vakuumpumpemit nillasaasuaniillu niperpalaaq sakkukitsoq kisiat tusaaneqarsinnaavoq.
Oqimaakkaluarluni sukkasooq
Misiliisut allat arlallit oqaatigaat biilit sangutinniarneri oqimaalaartut. Tamanna biilit mikisut Think City-usut oqimaannerannik pissuteqarpoq. Ton-i sinnerlugu oqimaassuseqarput oqimaassusiisa sisamararterutaat batteriit oqimaassuseralugu.
Oqimaakkaluarlutik sukkatsilertortarput. Pissarsiffigisaq naapertorlugu 160 km-isut ungasitsigisumut sukkanerpaaffissaa 110 km/t-uvoq. Biilit initaat aluminiumiuvoq silataa plasticiulluni. Marlunnik issiaveqarput nassataasivialu anngajaarluni, nassatanut, nerisassanut immaqalu meeraaqqat qamutaannut inissaqarluartumik.
Biilit opladeritaqareerput 230 voltimut ikkuffik 13 amperiusoq aqqutigalugu batteriit nalunaaquttat akunneranni arfineq marlunni qulingiluaniluunniit ulikkaarsinnaallugit.
Naalakkersuisunut ilaasortat innaallagiatortunik biilerput
Pingasunngornermi 14. juli 2010-mi nalunaaqutaq 15.00 Nukissiorfinni pisortaanerup Svend Hardenbergip biilinut innaallagiatortunut marlunnut matuersaatit Naalakkersuisunut ilaasortanut tunniutissavai. Aaqqissuussineq Nuummi Katerittarfik Amisuni pissaaq, tassani illoqarfimmiut aamma biilinik innaallagiatortunik Nukissiorfinnit pisiarineqarsimasunik takusaasinnaassallutik.
Naalakkersuisut siulittaasuat Kuupik Kleist, kiisalu Ineqarnermut, Attaveqarnermut Angallannermullu Naalakkersuisoq Jens B. Frederiksen angallatinik pujuliunngitsunik nipeqanngingajavissunillu marlunnik taakkuninnga qaammammi ataatsimi misileraasuussapput.
