Sikkilit innaallagiatortut bilernermut taartaassapput

Ataavartumik nukissiornerup, matumani erngup nukingata sumut atorneqarsinnaanera takutinniarlugu Nukissiorfiit innaallagiatortunik pingasunik sikkilisipput. Taamaalilluta suliffeqarfiup CO2-mik aniatitsinerata appartilaarneqarnissaa, kiisalu sulisut suli peqqinnerulernissaat naatsorsuutigaarput.

Sikkili innaallagiatortoq sikkilimut nalinginnaasumut assinguvoq, nassataasiviulli ataani battereeqarpoq. Batterii motoorimut assakaasuani saarlermiittumut innaallagialersuisuuvoq. Taamaammat innaallagiatortumik sikkilernermi nalinginnaasumik sikkilernertulli ilungersortariaqanngilaq – taamaattumik qummukajaat sapernannginneruleriasaarput.

Nukissiorfiit sikkiliutaat innaallagiatortut Nuummi qullersaqarfimmiittut anilluni pisassaqarnermi suliffeqarfiup sulisuinit atorneqarsinnaassapput. Sulisut bileratik sikkilimik niaquernaveeqqutitaanillu atuisarnissamut kaammattorneqarput.

Taama iliornikkut aningaasanik sipaartoqassaaq, avatangiisit CO2-mut illersorneqassappput, innaallagiaq erngup nukinganeersuummat sikkilertorlu timigissassalluni. Tassami sikkili innaallagiatortoq timigissarnikkut torrattuuvoq, motooria aatsaat sikkilertoq nammineq tukkartortillugu atorsinnaammat.

Qisuariarnerit ajunngitsut
Suliffeqarfimmi aaqqissuussinermi tallimangornermi ulloq 17. juli Nukissiorfiit Nuummi sulisui sikkilinik taakkuninnga nutaanik misileraanissamut periarfissaqarsimapput qiimmassaatigineqaqaarlu.
 - Sikkilertarfikkut oqqumukaarneq nuannivippoq amerlanerillu misileeqqaaraangamik qungujulasorujussuusarput, pilersaarusiornermut siuttoq Jens-Peter Bak Henriksen oqarpoq.

Ineqarnermut, Attaveqarnermut Angallannermullu Naalakkersuisoq Jens B. Frederiksen Nukissiorfiit aaqqissuussineranni peqataavoq. Ima oqaasissaqarpoq:
 - Tupinnaqaaq mingutsitsiviunngitsumik nukissiornermi toqqorterinermilu qanoq angusaqartigisimanersugut. Sikkili innaallagiatortoq una ataavartumik nukissiornermik samminniinnarutta angusaqarluarsinnaanitsinnut assersuutaalluarpoq, pineqartumilu ineriartorneq pissangagalugu utaqqivunga.

Kikkulluunniit misiliisinnaapput
Aggustip ulluisa arfineq pingajuanni Nuuk Maratonertoqarnerani Nuummiut sikkiliititsinnik misiliisinnaassapput. Tamanna Nuup qeqqani Katerittarfik Amisut eqqaanni Kuussuaq atuarlugu piffissami 12:00-14:00 pissaaq. Misiliiniaraanni inersimasut sikkiliannik sikkilersinnaareertariaqarpoq.

Ulloq taanna nalunaaqutaq 09:30-15:00 Nuummiut aamma Katuami saqqummersitsinermut takusaasinnaapput, tassani Namminersorlutik Oqartussat Nukissiorfiillu qanoq avatangiisinik mianersuusseqataasinnaanitsinnik, nukissamik sipaarsinnaanitsinnik uulianillu mingutsitsisunik atuinitsinnik millisaasinnaanitsinnik sukumiinerusumik oqaluttuutissalluta.