10. august 2010
Kalaallit Nunaanni motoorit annersaata ippassaq ataasinngornermi Nuummi Nordhavnimi innaallagissiorfimmut sillimataasumut ingerlanneqarmat inuit uuntritillit arlallit takkupput.
Ekvipage Umiarsualivimmit pilersaarutitut ataasinngornermi unnukkut nalunaaqutaq 20.00 aallarunneqarpoq. Tamatumunnga peqatigitillugu Nuummiorpassuit ekvipagep ornitaani piareersimareerput motoorerujussuaq takuniarlugu.
Motoori generatorilu pitariit ullaaq taanna Umiarsualivimmut tikipput umiarsuarmik 100 meteriusumik M/ Patria-mik, Caribiami Antiguami St. Johnimi umiarsualivissittartumik.
Umiarsualivimmi Kalaallit Nunaanni rekordiliisoqarpoq
Umiarsuaq sivisunerusumik usingiarneqarpoq, blokvogn immikkut ittoq motoorimik angallassissutissaq kiveqqaarlugu ikkunneqartussaammat. Tamatuma kingorna umiarsuup kranii marluk tamarmik immikkut oqimaannerpaamik 150 tonsinik kivitsisinnaasut motoorimik 300 tonsinik oqimaatsigisumik useqarfianit umiarsuup sinaatigut talittarfimmut arriitsumik aqqaapput. Tamatumunnga peqatigitillugu umiarsuup illua tungaani oqimaaloqutit nakkutigineqartussaapput.
Umiarsualivimmi sulisorpassuit, Nukissiorfinni sulisut, tusagassiortut kiisalu Blue Water Shippingimit Italiami Triestemi fabrikkimit angallassisuusumit angallassinermik suliffeqarfimmeersut peqatigalugit oqaluttuarisaanermi pisumik pissangallutik malittarinnipput.
Nalunaaquttap akunneri tallimat qaangiummata tamarmik oqiliallapput. Motoori blokvognimut millemeterinik eqquiffiusumik inissinneqarpoq maannalu unnukkut innaallagissiorfiliaassinissamut utaqqiisaa ajornaquteqanngitsumik inissinneqarsinnaanngorluni.
Umiarsualivimmit umiarsualivimmut
Motoori ataasinngornermi unnukkut kiisami 400-vejikkoorunneqalermat isiginnaartut ilimasuuteqarluarput. Evkipage inummit ataatsimit naamini joystickimik aqunneqartoq aamma ajornakusoorfinnik arlalinnik qaangeereerpoq.
- Kaar, assakaasorpassui takukkit, inuusuttuaqqat isiginnaartut ilaat suaarpoq, blokvogni 16-inik akselilik isigiitigalugu, tuaviinnarlu angallassissutip takisuup qassinik assakaasoqarnera misissupallanneqarpoq.
Assakaasuisa ilaat asfaltimit anillagullutik aqitsumut usimik oqimaatsumik nammassinnaassagunanngitsumut pisoormata isiginnaartorpassuit pissangallutik aqqaamapput. Angallassinermilli ilisimasallit Tysklandimeersut ajornartorsiut sapinngilluinnarlugu aaqqippaat, kaajallatsillugu naggataagut – nalunaaquttap akunnera sinnilaarlugu arriitsunnguamik pisoreerlutik – motoori motoorip toqqavissaanik sanaartorfiup eqqaanut inissippaat.
Sapaatit akunnerat qaangiuppat inississaaq
Motoori Finlandimi Wärtsilä-mit tunisassiaavoq 17 MW-iulluni – motooriutivut annerpaat tullii marluk Nordhavnimeereerput tamarmillu 6,4 MW-iullutik. Generatori ABB-meersuuvoq.
Pitariit rekordit ataasinngornermi aggustip ulluisa 16-ianni toqqavissaannut ikkunneqarnissaat naatsorsuutigineqarpoq.
