Qorlortorsuarmi erngup nukinganik innaallagissiorfimmik takusaatitsineq

Pisortaanerup Svend Hardenbergip Kujataani Qorlortorsuarmi erngup nukinganik innaallagissiorfik Naalakkersuisumut Jens B. Frederiksenimut 3. juni 2010-mi takusartippaa.

Svend Hardenberg Kujataaniitilluni erngup nukinganik innaallagissiorfik Naalakkersuisumut Jens B. Frederiksenimiut Naalakkersuisoqarfiullu pisortaanut Steffen Ulrich-Lyngemut ingerlatsinermut qullersaq Søren Pedersen siunnersortilu Jørgen Raa Andersen peqatigalugit takusartippaat.
- Naalakkersuisup Naalakkersuisoqarfiullu pisortaata sanaartukkami takornariartinneqarnertik nuannaarutigeqaat. Pilersaarut pillugu ilutsinni eqqartortuakkatsinnut tunngasunik ilisimasaqarnerulerlutillu paasisaqarnerupput, Svend oqaluttuarpoq.
  Nukissiorfiit Nunatsinni assigiinngitsunik erngup nukinganik innaallagissiorfeqarpoq. Aallakaatitsissut, ikkussukkat assigiinngitsut allallu suliamut isumaqatigiissaanermut tunngasut tamaasa takutippavut. Tamatumunngami atatillugu aamma Qorlortorsuarmi innaallagissiorfimmi teknikikkut suliat Sisimiuni Nuummilu sanaartukkanit allaanerupput taamaattumillu aamma Naalakkersuisumut Naalakkersuisoqarfiullu pisortaanut takutinneqarnissaat naleqqulluni, Svend oqarpoq.

Isumaqatigiissitsiniarnermi suliaq
Sanaartukkamik takusaatitsinerup ingerlanerani Naalakkersuisoq Isumaqatigiissitsiniarnermi suliaq Nukissiorfiit Energikonsortietillu akornanni ingerlasumut tunngasunik takutinneqartarput. Jens B. Frederiksenip Steffen Ulrich-Lyngellu ingerlaavartumik eqqartortagarpassuatta namminneq isiminnik takusinnaanerat qutsatigisorujussuuaat. Ukiup tulliani (2011) isumaqatigiissitsiniarnermi suliaq inaarutaasumik aalajangiiffigineqarnissaa naatsorsuutigaarput, Svend naggasiivoq.

Tatsip imaanik ajornartorsiuteqarnerup killiffia
Kalaallit Nunaat tamakkerlugu panertorujussuuvoq siallerpiarsimanngilarlu. Qorlortorsuarmili sapaatit akunneranni pingasuni kingullerni imeq 3 meterimik qaffassimavoq. Aputip sermillu upernaami aannerisigut qaammallu kingulleq (aaqq.: maj) siallerneratigut taseq immaqqikkiartulaalersimavoq naak paneraluaqisoq.
Taamaattorli sapaatit akunneranni 24, 25 26-milu Nukissiorfiit erngup nukinganik innaallagissiorfimmik matusisariaqarput sarfamut sakkortuumut aqqutip aserfallatsaaliorneqarnissaa pissutigigalugu, ingerlatsinermut qullersaq Søren Pedersen oqarpoq.
Siunissami qaninnermi isumaqatigiissitsiniarnermi suliaq aalajangiiffigineqariarpat misissueqqaartoqassaaq, Qorlortorsuup tasianut qaqugu qanorlu immiinerusinnaanermik naliliiviusussamik.