Qaqortumi atuarfik tamakkiisumik ungasianit kiassarneqarpoq

Nukissiorfiit ullumi 6. august 2010-mi Qaqortumi atuarfimmi Tasersuup Atuarfiani ungasianit kiassaanermut aqqutip ikkusimanera allanngortippaa. Atuarfik ilaannakortumik ungasianit kiassarneqareerluni maanna tamakkiisumik ungasianit kiassarneqalerpoq taamalu iliornikkut inuiaqatigiit uuliamik liitererpassuarnik sipaarfigineqarput.

Nukissiorfiit aamma Kommune Kujalleq suleqatigiillutik atuarfiup kiassaateqarfianik uuliatortumik atorunnaarsitsipput. Siusinnerusukkut ungasianit kiassaanermut tapertaasimavoq kissamillu atuinerup 2/3-iata missaanik pilersuisuusimalluni.
– Atuarfiup saniatigut aamma Ilinniarnertuunngorniarfiup ilinniartunut ineqarfiutaanut, Piareersarfimmut atuisartunullu ataasiakkaanut ulloq manna tikillugu atuarfiup kiassaateqarfianit kiassarneqarsimasunut pilersuilerpugut, suleqatigiinni aqutsisoq Gert Kjaer oqarpoq.
   Allannguinikkut Nukissiorfiit illoqarfimmut kiassaanerat 15 %-it missaannik annertusineqarpoq. Kiassaaneq siunissami ikuallaavimmik atorluaanerunikkut kiassaateqarfimmilu elektrokedlinik atorluaanerunikkut pilersorneqassaaq.

Arlalinnik atorunnaarsitassaqarpoq
Atuarfiup kiassaateqarfianik atorunnaarsitsineq kommunip illutaasa tamarmik ungasianit kiassaanermut aqqutinut ikkussuunneqarnerannut sivisunerusumik suliarineqartumut ilaavoq.
   - Ikkussuineq ingerlaavartumik pisassaaq kiassaateqarfiusut nutaanngilisarneri atorunnaartariaqarnerilu peqatigitillugit. Nutaanik pisinissamut taarsiullugu ungasianit kiassaanermut aqqutinut ikkussisoqartassaaq, Gert naggasiivoq.