Qaaqqusineq iluatsilluartoq

Ippassaq sapaammi juulip ulluisa 24-at Nukissiorfiit entreprenøri Ístak-ilu Paakitsumi qaaqqusipput, Ilulissani erngup nukinganik nukissiorfiup sananeqarneranut atatillugu. Uani Ole Kristensen, Nukissiorfiit sanaartorfimmi nakkutilliisuat aaqqissuussineq iluatsilluartoq pillugu oqaluttuarpoq:
 
Sapaammi ullaaq sakkortuumik anorlerpoq sanaartorfiullu saavaniillunga kangerluk qiviarakku eqqarsarpunga, aaqqissuusinermut ataasinnguarluunniit takkukkunnanngilaq. Ullaap tungaa anori sakkukilliimivoq. Ullup qeqqalersoq umiatsiannguaq marlunnik inuttalik tikippoq. Tassa tikeraartussagut taakkutuaannaassanerpat?
 
Ataatsip eqqaani ataasiakkaannguit takkussuupput – kisianni tassa taava pisoqalerpoq. Tassanngaannaq sanaartorfiup tungaanut umiatsiarpassuit aggersut takuneqarsinnaalerput. Qujanartumik sunaafffa Paakitsumut inuppassuit sapaatisioriarniarlutik aalajangersimasut. Ulloq naammat pulaartut allattorsimaffiannut inuit 170-t allassimapput. Eqqoriarparput tikeraartut 200-t missaanniissimassassut.Umiatsiat 40-50-t missarivaat.
 
Tikeraarneq kantiinami aallartippoq ”tikilluaqqusinermi kaffisortitsinermik”. Sandwich-inik kaaginik, vaffelit qalaqqaat, kaffi, te saftimillu sassaalliisoqarpoq. Inuppassuit imminnut nalunngillat oqaloqatigiilluartoqarporlu. Nukissiorfiliarnissamut bussinik ilaanissaq periarfissaavoq. Ualerlu ingerlanerani arfineq’pingasoriarluni bussinik takornariartoqarpoq. Bussinik ingerlaarnerup saniatigut usisartaateeqqanik arfinilinnik tikeraat taseq 187-mut uteqattaarullugit ingerlanneqarput.
 
Nalunaaqutaq sisamanut naammassiniarluta pilersaarsimagaluarpugut, kisianni inuit tamarmik suna tamaat takunissaanut periarfissaqarniassammata aammalu tikeraat allaat nalunaaqutaq sisamat tungaanut takkuttarmata, aaqqissuussineq arfernup qeqqata tungaanut ingerlatiinnarparput.
 
Ualeq ulapaarfiuvoq. Tikeraat nuannaarlutik ilimasullutillu takkussuupput. Assorsuaq sanaartorfik takorusunneqarpoq. Inuppassuit takusaminnut pissaganartorsiorsimallutik oqartarput. Sanaartorfiup sulisuinut, takornariartitsisunut misigisaq aamma nuannerluinnarsimavoq. Iluaqaaq ukioq ataatsip missaani suliarisimasaq takutissuutissallugu.
 
Tamaat isigalugu ulloq nuannerluinnartumik ingerlavoq. Ataasinnguamilluunniit qularnanngilaq – aappaagu aamma assigisaanik aaqqissuussisoqassaaq!