Pilersaarutit malillugit sulisoqarpoq

Ungasianit atuaassutilerisut innaallagiamik atuinermut uuttortaatinik 25.000-it missaanniittunik taarsersuereerput aasaaneranilu sulinngiffeqarniarlutik Nuummut uterput.

Illoqarfiit Maniitsoq, Aasiaat Kangaatsiarlu taakkulu nunaqarfii ukiup affaata kingulliup ingerlanerani ungasianit atuaassutilerisunit tikeraarneqarsimapput.
   - Ingerlalluavippoq piffissalersuinermiillu siulliulaarpugut, pilersaarummik aqutsisoq Kent Skildal oqarpoq.
   - Illoqarfinni sulereeratta juunip ulluisa aqqaneq aappaanni Aasiannit Kangaatsialiarluta Kangaatsiallu nunaqarfiinukarluta kujammut aallarpugut.
   - Tamatuma kingorna Sarfannguanukarpugut 2007-imi siullernut ilaalluni innaallagiamik atuinermut uuttortaatinik misiligutitut taarsersuiffiusumut. Uuttortaatit taakku ammartagaanatillu matusagaannginnerat pissutigalugu uuttortaatit taakku taarseqqinneqarput.
   - Tamatumunnga peqatigitillugu ilisimatitsissutigisinnaavara uuttortaatitoqqat maangaannartinneqarneq ajormata taamaattorli imertartarfinni netstationinilu nammineq ikkussugaatitsinni atorneqassallutik, taakku matuneqanngisaannassagunarmata.
   - Tamatuma kingorna Maniitsup nunaqarfiinukarpugut, Kangaamiunut, Napasumut Atammimmullu.
   - Imermik atuinermut kiassarnermullu uuttortaatit nunaqarfinnut assigiinngitsunut tikinnginnitsinni taarserneqareersimapput. Suliaq tamanna najukkami immikkoortortaqarfinnit isumagineqarsimavoq najukkami entreprenørit ikiorsiullugit, Kent naammagisimaarinnittoq oqarpoq.
   Maanna innaallagiamik imermillu atuinermut kiisalu kiassarnermut uuttortaatit 80 %-iisa missaanniittut ungasianit atuarneqarsinnaasunik nutaanik taarserneqareerput.

Taarsersuineq nanginneqassaaq
Illoqarfinni nunaqarfinnilu assigiinngitsuni innuttaasut suleqatigiinnik maluginiagaqanngitsuunngillat, tamannalu ilaasa oqaloqatigineqarnerannik kinguneqartarpoq.
   - Ataatsimut isigalugu inussiarnersorujussuupput pitsaallutillu, Kent oqarpoq. Aasaanerani sulinngiffeqarnerup kingorna aggustip qiteqqunnerani taarsersuineq aallarteqqissaaq.
   - Qasigianngualiarluta aallartissaagut, qaammat ataaseq tassaniinnissarput naatsorsuutigalutigu. Tamatuma kingorna Qeqertarsuup Tunuani nunaqarfinnut tamanut Qeqertarsuarmilu Kangerlummut ingerlaassaagut, Kent oqaluttuarpoq.
   Suleqatigiit nunaqarfimmeereerunik Qasigiannguani taarsersuinertik naammassisimanngikkunikku naammassissavaat.
  - taava ukioq manna illoqarfiit naggaserlugit Ilulissani aallartissaagut, Kent naggasiivoq.