16. august 2010
Sulisut Paakitsup eqqaani campimi najugaqarlutillu sulinissaat aasaanerani juunip juulillu qaammataani piareersarneqarpoq. Sullorsualiassanut aqquserniorneq, Ilulissallu tungaannut innaallagissap aqqutaanut atugassanik toqqaliviorneq aamma ingerlanneqarlualereerput.
Paakitsumi – Ilulissani erngup innaallagissiorfissap inissisimaffigisassaani – maanna campeqarpoq, tassaniippullu kantiina, sannavik, quersuaq betoniliorfillu, taakkulu innaallagissamik imermillu pilersorneqarput kiisalu internetteqarlutillu oqarasuaateqartinneqarput. Sulisussanit 90-iusunit 60-it isertereersimapput.
Entreprenøri E. Pihl & Søn Grønland ApS, Islandimiut piginneqatigiit suleqataasut Ìstak suleqatigalugit, aamma Ilulissani kantiinamik inuillu 22-t najugaqarfissaannik pilersitsisimapput. Sulisut Paakitsumi campip naammassinissaata tungaanut tassani najugaqarput. Taamani ullaakkut kangerlummut angallammik suliartortarput unnukkullu angerlaqqittarlutik. Innaallagissap aqqutaanik suliaqartut inuit aqqaniliusut illoqarfimmi najugaqarfik sapaatit akunnerisa naanerini atugarivaat, ulluinnarnilu tuperni sarfarp aqqutaata suliarineqartup eqqaani najugaqartarlutik.
Suliat inissititilerput
Turbinenik, generatorinik transformerinillu sanaartortitsinissamut isumaqatigiissutit inissereerput. Atortorissaarutit atortussiallu amerlanersaat aasap ingerlanerani tikisinneqarput. Innaallagissiorfiup sanaartorneqarnerani atugassat. Sisimiuni erngup innaallagissiorfiup sanaartorneqarnerani atortut ilarpassuinik atueqqiisoqarsinnaasimavoq, allallu Europamiit tikisinneqarsimallutik.
Saniatigut ingenøritut suliffeqarfiit Verkis aamma Efla erngup nukinganik innaallagissiorfissap ilusilersornissaanik suliaqarput.
Aqquserngit
Campimiit illorsuarmut isaaffimmut aqqusineq 2,5 km-inik isorartutigisoq juulimi atorneqarsinnaalerpoq. Kingornatigut qaqqap iluani inaallagissiorfissamut aqqutissatut sullorsualiortoqassaaq. Tatsini marlunnit imermik innaallagissiorfimmik imermik pilersuisussanut erngup aqqutissaanut aqqusiniliortoqarnissaa maanna sulissutigineqarpoq, siullermik tatsimut 187-imut, kingornalu tatsimut 233-imut.
Sullorsualiat
Peqatigisaanik sullorsualiornerup aallartinneqannginnerani piareersaaneq suli ingerlanneqarpoq. Sullorsualiornerup aatsaat aggustip 30-iani aallartinneqarnissaa naatsorsuutigineqarpoq. Sullorsuarmik erngup innaallagissiorfimmeersup kuuffissaanik suliaqarneq aamma aggustimi aallartinneqassaaq.
Sullorsualiorneq Slovakiamiut suliffeqarfiannit TuCon a.s.-imit, sullorsualiornermik immikkut suliaqartunit, suliarineqassaaq.
Innaallagissap aqqutai
Erngup nukinganik innaallagissiorfimmit innaallagissap aqqutai 50 km-it miss. takitigissaaq. Napparutissat toqqavissaasa 1/3-iisa miss. naammassineqareerput.
Erngup nukinganik innaaallagissiorfimmi turbine siulleq atorlugu innaallagissamik pilersuilernissap novembarip aallaqqaataani 2012-imi pinissaa naatsorsuutigineqarpoq. Nukissiorfiup, 3x7,5 MW-inik turbineqarluni, tamakkiisumik ingerlalernissaa 2013-imi naatsorsuutigineqarpoq.
(Asseq: Ujarak Rosing Petersen-imit)
