Nuummi Nordhavnimi ulappunneq

Nuummi Nordhavnimi innaallagissiorfissap sillimmataasussap allilerneranik sulineq aallarteruttorpoq. Generatori motoorilu qaammatip matuma tulliatalu ingerlaneranni misilerarneqassapput.

Generatori maajip ulluisa 18-ianni fabrikkimi misilerarneqarsimavoq ajornartorsiutitaqanngitsumillu ingerlasimalluni. Tulliuttoq tassaavoq motoorip fabrikkimi misilerarneqarnissaa tamatumalu juunip qiteqqunnerani pinissaa pilersaarutaavoq. Fabrikkimi misileraaneq Italiami Trestami pissaaq.
   - Motoori generatorilu tunniuteriaannanngorlugit Italiami katiterneqareerpata Kalaallit Nunaannit immikkut umiarsuarmik assartorneqassapput. Katillugit 358 tonsiupput, sanaartortulerivimmi qullersaq Lars Hoffmeyer oqaluttuarpoq nangillunilu tunniussineq ukioq manna aggustimi pissagunartoq.
   Tamatuma saniatigut Nordhavnimi illuutit katillugit pingasut sananeqassapput sulinerlu sapaatit akunneranni matumani aallartissaaq. Illuutit sananeqartussat innaallagissiorfiup sillimmataareersup allilerutissarai, illuut ataaseq nutaajulluni kiisalu toqqorsiveqassalluni aamma garagetut atugassamik.