Nuuk motoorimut rekordiliiffiusumut piareersarfiuvoq

Nuummi Nordhavnimi innaallagissiorfiup allilerneqarnera aallarteruttorpoq. Motoorerujussuup generatorerujussuullu Italiamit takkutingajalersup toqqavissaat 28. juli 2010-mi kuineqarpoq.

Immap sumiiffimmut sanaartorfiusumut kuunneranik ajornartorsiutip aaqqinnerata kingorna toqqavik maanna kuineqareerpoq.
   Kuiffissaanut beton 137 m³-it missaanniittoq kuineqarpoq. Toqqavik motoorimut generatorimullu iliffissatut naammattumik ninngussuseqarniassammat maanna ullut 14-it missaanni uninngatinneqassaaq. Tassami ikkunneqartussat tamarmiullutik 358 tonsersuupput taamaalillutillu Nukissiorfiit oqaluttuarisaanerani dieselimut atortut annersaassallutik. Ullumi Nukissiorfiit pigisaat annerpaat marluk Nordhavnimeereerput.

Marlunnik quleriilik ingerlanneqassaaq
Pissarsiffigisamit inuit Tysklandimit aggustip ulluisa tallimaanni Nuummut tikissapput. Inuit taakku motoorip generatorillu umiarsualivimmit Nordhavnimut angallanneqarneranik isumaginnittuussapput. Tamatumanimi inuit suliassaqarfimmik ilisimasallit pisariaqartinneqarput.
   Motoori generatorilu blokvogninik; tassa ekvipagemik ilaqutariinnut ataatsinut illutut marlunnik quleriilittut angissusilimmik illoqarfikkoorunneqarnissaat naatsorsuutigineqarpoq.
 
Italiamit tunniussineq
Umiarsuaq motoorimik generatorimillu usisoq Italiamit Nuummut tikissaaq illoqarfiup avataani aggustip ulluisa arfernanni kisassalluni. Umiarsuup usingiagassanngorluni qaqugorpiaq talinnissaa suli ullulerneqanngilaq. Royal Arctic Lineli akuerseriarpat tamanna pissaaq.

Innaallagiatortumik kiassaaneq annertusaaviusariaqarpoq
Nordhavnimi innaallagissiorfiup Kangerluarsunnguami erngup nukinganik innaallagissiorfimmut sillimmataasup allilerneqarnera Nuummi innaallagiamik atuinerup annertuserujussuarneranik aallaaveqarpoq.
   - Innaallagiatortumik kiassaanermi illoqarfimmut alliartupiloortumut erngup nukinganik innaallagissiorfeqalerattali sanaartukkanut tamanut ikkussuunneqartumi ukiumi issinnerani innaallagissiorujussuarsinnaanissarput pisariaqarpoq, pilersaarusiornermut aqutsisoq Lars Hoffmeyer nassuiaavoq.
   Tamanna aamma erngup nukinganik innaallagissiorfiup 2008-mi allilerneqarneranut illoqarfimmilu sillimmatissanik utaqqiisaasunik containerinik arfineq-pingasunik ikkussinitsinnut pissutaavoq. Maanna tassa ataavartumik sillimmateqarnikkut aaqqiisoqalerpoq erngup nukinganik innaallagissiorfik illoqarfimmut innaallagialersuisinnaajunnaaraangat atorneqarsinnaasumik.