Ukiuni tulliuttuni marlussunni Nukissiorfinni suliffeqarfiup suliassaasa unamminartut ilaat aallartinneqassaaq, tassalu innaallagissamut, imermut kiassarnermullu atuinermik uuttuutit 30.000 missaaniittut ullumikkut atorneqartut nuna tamakkerlugu allanik ungasianiit nalunaarsorneqarsinnaasunik taarsersorneqassammata, suliarlu tamanna ukioq 2014-imi naammassineqassasoq naatsorsuutigaarput.
Ukioq manna maajip qaammataani nunatsinni siullerpaatut Sarfannguani Sisimiut pigisaani uuttuutit tamarmik taarserneqarput, taamaaliornermilu misilittakkat tunngavigalugit periuseq taanna nunatsinni tamarmi atulissasoq Nukissiorfinni aalajangerparput. Uuttuutinik taarsersuineq Nuummi aallartinneqassaaq, ukiorlu 2008 naatinnagu uuttuutit 12.000 missaaniittut tamarmik taarserneqarsimassapput. 2007 naatinnagu illoqarfiup immikkoortuani Qinngutsinni uuttuutit taarserneqariissapput, taamaalilluta Nuup immikkoortortaqarfiani taakku misiliutitut atorlutigik.
Uuttuutinik ungasianiit nalunaarsuineq sunaagami?
Innaallagissamik, imermik kiassarnermillu atuinermut uuttuutit ungasianiit uuttuummik taarserneqarneratigut nalunaarsuineq nammineerluni pisalissaaq taamaaliornerlu patajaannerullunilu eqqornerussaaq. Uuttuutit ataasiakkaat nassitsissutinnguaqassapput uuttuummut attaveqaataasussamik. Ullut tamaasa nassitsissutip atuineq qitiusumi nalunaarsuivimmut nalunaarutigisassavaa. Nalunaarsuivik qitiusumiittoq uuttuutinut 200-miit 300-mut amerlassusilinnut attaveqarsinnaanngorlugu ikkunneqartassaaq uuttuutillu taakku nalunaarsortassallugit. Tassanngaanniit nalunaarsukkat Nukissiorfimmut nassiunneqartassapput, akiligassiinissallu tungaanut toqqorneqarlutik.
A conto-mik akiliisarneq ilaannakuusumik atorunnaassaaq
Ullut tamaasa uuttuutinit atuinerup nalunaarsorneqalerneratigut qaammatikkaartumik akiligassiisoqarsinnaalissaaq, tassanilu atuineq piviusoq tunngavigalugu akiligassiisoqartassalluni. Inoqutigiit immikut atuisimanermik uuttuutillit, oqarasuaatinik atuisarnermi akiliisarneq assigalugu, akiliisalissapput. Nukik atugarput taamaallaat akilertassavarput.
Ullut tamaasa nalunaarsuisalerneq ima kinguneqassaaq nuuttoqartillugu nalunaarsuineq ullormi tassani uuttuut ikkunneqarlunilu peerneqartalissalluni, toqqaannartumillu atuinermut naggataarutaasumik akiligassiisoqartalissalluni.
Qinngutsinni uuttuutit tamarmik taarserneqareerpata Nuup sinnerani taarsersuineq ingerlanneqassaaq. 2008-mi martsip aallartinnerani Nuuk Ugeavis-imi najugaqarfiit sorliit taarsersuiffigineqassanersut nalunaarutigineqassaaq, kiisalu nalunaarutigineqassalluni Nuummi Nukissiorfiit taarsersuinerat sumut killinnersoq.
Innaallagissamik atuineq Internetsikkut
2008-p ingerlanerani Nukissiorfiit nittartagaatigut atuisut nammineerlutik qanoq atuitigisimanertik malinnaavigisinnaalissavaat. Tassani uuttuutigisamut “isernissaq” periarfissaqalissaaq piffissamilu aalajangersimasumi qanoq atuitigisimaneq takuneqarsinnaalissalluni. Tamanna periarfissaalerpat Nukissiorfinni atuisut nalunaarfigineqarumaarput.
Paasissutissat annertunerusut
Annertunerusumik paasisaqarusuttut januarip 19-ani Nukissiorfiit Unnummi Kultoorisiorneranni ungasianiit uuttuutinik nalunaarsueriaaseq takuneqarsinnaajumaarpoq, kiisalu EXPO 2008-imi Inussivimmi januaarip 18-aniit 20-anut ingerlanneqartussami.
Paasissutissat allat:
Innaallagissamik atuineq:
Siunissami innaallagissamut uuttuutit tamarmik ungasianiit nalunaarsorneqartalissapput, atuisullu tamarmik atuinertik naapertorlugu akiliisinneqartalissapput, á conto-mik atuineq piunnaarlugu. Taamaalillutik kikkut tamarmik innaallagissamik atuinertik malinnaavigisinnaalissavaat. Inoqutigiinnut tamanut tamanna atuuppoq, namminerisamik inigisaqaraanni imaluunniit INI A/S-imi attartortuugaanni.
Imermik atuineq:
Atuisut maannakkut Nukissiorfinniit immikkoortumik imermut akiligassinneqartartut siunissami atuinertik naapertorlugu akiliisinneqartalissapput áconto-mik akiliinatik. Atuisut najugaqartut peqatigiiffiatigut akiliisartut allannguinermik malugisaqarnavianngillat.
Kiassarnermut atuisut:
Kiassarnermut atuisut siunissami atuinertik naapertorlugu akiliisinneqartalissapput, taamaalilluni ukiuunerani akiligassaq annertunerulluni aasaaneranilu minnerulluni. Atuisut najugaqartut peqatigiiffiatigut akiliisartut allannguinermik malugisaqarnavianngillat, soorlu imermut tunngatillugu taamaattoqartoq.
