Christian Lindegaard Petersen Mark Fogh Pedersenilu Nukissiorfinni suliffeqarfimmi misileereerlutik teknisk manager offshore (TMO)-tut naammassipput. Immikkoortortaqarfimmi Aasiaat/Kangaatsiami suliffeqarfimmi misiliipput, tassani kiassaateqarfik 1 pilersaarusiaq pillugu Aasianni suliaqarsimallutik.
Christian Markilu Esbjergimi Erhvervsakademi Sydvestimut attaveqarsimapput, tassani maskinmesteritut qaffasittigisumik ilinniartuullutik, ilinniagaat taaneqartarpoq teknisk manager offshore, offshore-mut sammiveqarpoq nunamilu suliffigineqarsinnaalluni. Ilinniagaq taanna professionsbacheloruddannelseuvoq ukiunillu sisamanik sivisussuseqarpoq suliffeqarfimmilu qaammatinik pingasunik misiliinermi tapertaqarluni.
Sooq Nukissiorfiit?
- Nukissiorfiit suliffeqarfik pillugu saqqummersitsineranni sulisut oqaloqatiginerisa kingorna, Kalaallit Nunaanni suliffeqarfimmi misiliinissara kajungerilersimavara. Kalaallit Nunaat takorusuttuaanarsimagakku, periarfissatsialattut naammattoorsinera pillugu Nukissiorfinni sulisulerivianut qinnuteqaatiga nassiuppara, Mark oqaluttuarpoq.
- Suliffeqarfik Nukissiorfiit pissanganartippara Kalaallit Nunaannilu ilaquttakka arlallit sulinikuupput, Chistian oqaluttuarpoq nangillunilu:
- Ilaquttakka arlalitsigut namminneq misigisalersaartarput aamma inuiaqatigiit qanoq allaanerutigineri pinngortitarsuullu tunniussinnaasai pillugit oqaluttuartarput. Maskinmesterit ukiumoortumik saqqummersitsineranni Nukissiorfinnut attaveqaqqaarpunga, tassani suliffeqarfimmi misiliisimasoq naapillugu misigisartakkaminik oqaluttuarmat pileritsakkaluttuinnarpunga.
- Aalajangerpunga qinnuteqaatiga nassiunniarlugu, suliffigiligassamaakkannullu aallarniutaalluarumaarmat, aammalumi ilaquttakka arnaatigalu aallarlunga qimassimasinnaaneri misilinniarlugit, kisiannili aamma mekanikki teknikkilu pillugit assigiinngitsorpassuarnik sammisaqartussaanera pissutigalugu.
Illoqarfiup kiassaateqarfiata pitsanngorsarnera
Chistianimut Markimullu pilersaarusiaq piffissaq sioqqullugu nassiunneqarpoq, taannalu kiassaateqarfik 1 pillugu imaqarpoq. Kiassaateqarfik piffissap sivisuup ingerlanerani ingerlatsinera ajorsigaluttuinnarsimavoq. Taamaattumik ingerlatsinera pitsaanngilluinnartuusimavoq kukkunerit amerliartuinnarsimammata. Kiassaateqarfiup ikkussuunnerpiaa aqunneqarneralu pillugit allatut ajornartumik kiassaatit marlunngorlugit atortariaqarsimapput, naak kiassarnermi pisariaqartitsineq kiassaammik ataasiinnarmik matussuserneqarsinnaagaluartoq.
- Illoqarfiup kiassaateqarfiata ingerlatsinera aningaasaqarneralu pillugit pitsanngorsarneqarnissaat suliarisussanngorsimavarput, Christian oqarpoq.
- Kiassaateqarfiup qanoq sananeqarsimanera paasiniartariaqarsimavarput kiassaateqarfiup ajoqutai eqqarsaatigalugit, kiisalu kiassaateqarfiup aqunneqarnera qanoq ingerlanersoq, Mark oqaluttuarpoq nangillunilu:
- Ilaatigut assigiinngitsut pillugit paasissutissanik pisarialinnik pissarsiniartilluta erloqisinnaasarpugut.
- Suliaq pillugu Maniitsumiippugut illoqarfimmi Nukissiorfiit kiassaateqarfia qanoq ingerlanersoq misissoriartorlugu.
- Kiassaateqarfiup pitsanngorsarnera pissaganarluinnartuujuaannarpoq unammillernarlunilu, kiassaateqarfik ajunnginnerusumik ingerlalernissaa imminullu aningaasatigut akilerluarsinnaanngornissaata misilinnera, Mark oqarpoq.
- Paasivarput, naatsumik oqaatigalugu, kiassaateqarfiup aqunneqarnera katiterneralu allanngortariaqartoq, Christian oqarpoq.
Suliamik saniatigut, Mark Christianillu aamma elværkimi sulisimapput, tassani ulluinnarni aserfallatsaaliunermik iluarsaassassanillu sulinerni peqataasarlutik.
- Misigisarpassuarnik nuannertunik misigisaqarpugut aamma ”assakka ipertillugit” sulillunga, pinngitsoorani suliffigiliumaagassannut tunuliaqutaalluarsimavoq, Christian oqarpoq.
Misigisat tupinnarluinnartut
- Marluulluta aasarisseruttortoq kiassuup ataani paasivarput aallartussaalluta, takorloorsinnaanngilaraluunniit qaammatit arfinillit qaangiummata Aasianniissallunga – 15-nik issittoq apussuarmillu ulikkaartoq, Christian oqaluttuarpoq.
- Nunap isikkua sakkortoqaaq alutornarlunilu. Aallaqqaammulli Danmarkimut naleqqiullugu suna tamarmi arriittumik ingerlasoq sungiunniagassaaqqaarpoq, Mark oqarpoq.
- Maaniinnerma nalaani assiliissutiga atorluaqaara, pinngortitarsuarlu tupinnangaartoq arlalippassuarnik assilisaqattaarpara, kisiannili aamma teknikkimut tunngasut TMO/maskinmesterinut kikkunnulluunniit nuannaarutaalluarsinnaasunik assiliivunga, Chistian oqarpoq sunngiffimminilu aamma Nukissiorfiit eqaarsaartarfeeraaniittarsimasoq kiisalu helikopterit biilillu alimasissumit aquttakkat sammisarsimavai.
- Aamma weekendimi Ilulissanut timmisartorpugut, tassani angallammut ilaalluta Sermermiut takusarpavut. Misigisaq kakkaqaaq, qaqululuunniit puigunngisaannassavara, Mark oqarpoq Christianilu nangippoq kaperlak misigisaq tupinnarluinnarnerarlugu, paasinerarpaalu Kalaallit Nunaata pinngortitarsua alutornartorsuusoq.
Maaniinneranni assilisaat uani takusinnaavatit (pdf-fil-kkut)
