9. juli 2008
Nukissiorfiit suliassamik aatsaat taama annertutigisumik suliamik aallartitsisimanerat nunarsuatsinni aamma alapernaanneqalersimavoq. Maajip naalernerani Nukissiorfinni sulisut marluk Barcelonamut qaaqquneqarput ungasianiit nalunaarsorneqartartunik uuttuutilersuinermut tunngasunik saqqummiiartoqqullugit Europami taamatut suliniuteqarneq pillugu ataatsimeersuarnermi.
Nukissiorfiit oqaluttarfimmi
Ulluni marlunni, 28.-29. maj, illoqarfissuarmi Barcelonami ungasianiit nalunaarsuisarnermi sulialinnut ataatsimeersuartoqarpoq. Tassani EU aaqqissuisuuvoq, sisamassaalu taamatut aaqqissuussipput, sammisami Europami aaqqissuussat annersaanut ilaasoq.
Ungasianiit nalunaarsuinermut tunngatillugu suliniummi sulisut marluk pisiniarnermut pisortaq Kent Skildal kiisalu ineriartortitsinermut siunnersortaasimasoq Peter Kjeldmann marluullutik peqataapput. Peter Kjeldmann aamma inuit ikittuinnaat akornanni saqqummiinissamut periarfissaqarsimavoq.
- Suliniut nalinginnaasumik eqqartorpara. Qanoq ililluta nunamut tamarmut teknikki taamaattoq atussallugu aalajangersimaneripput, sukkasuumik isumannaatsumillu, Peter oqaluttuarpoq.
- Taava aamma nunaqarfimmi Sarfannguani Sisimiut eqqaaniittumi siorna suliarput eqqartorpara nunatsinnilu pissutsit immikkut ittut.
Immikkut ittoq
Nunarsuatsinni nukissiuuteqarfippassuit atuinermut uuttuutiminnik taarsersuileruttorput, imaluunniit taamaaliornissartik piareersarlugu. Sverigimi siuarsimanerpaapput, 2003-imi inatsisiliorsimagamik innuttaasut innaallagissamik atuisut tamarmik kingusinnerpaamik 1. juli 2009 atuinerminnut tunngatillugu qaammatikkaartumik nalunaarsorneqartassasut. Aamma nunaqarpoq uagutsinniit siulliullutik taarsersuisimasunik, taamaattorli suliniuterput alapernaanneqartupilussuuvoq.
- Uagut suliniuterput immikkukajaaq inissisimavoq sumiiffimmi killeqartumi ingerlanneqarmat. Ataatsikkut uuttuutit nunamiittut tamaasa taarsersinnaavagut, Kent nassuiaavoq.
- Allaat ilaasa usorivaatigut taamaaliornitsinni periarfissatsinnik. Soorlu teknikkikkut aaqqiinermik ataatsimik toqqaasimagatta. Kiisami inukittuuneq iluaqutaavoq, tamanna oqaatigissallugu pingaarpoq, Peter nangippoq.
- Aammami atortunik pisiniarfigisatta taamaaliornermut ima nalilerpaat, teknikkip taassuma pissutsit taama sakkortutigisut anigorsinnaappagit taava sunaluunniit anigorsinnaassagaa. Taakku tunisassiaannut takoqqusaarutaavugut pitsaasumik, taamak oqarluaannaraanni.
Barcelonamiinnertik pikkunaqisoq ataatsimeersuarnermi peqataasut marluk pitsageqaat.
- Piffissaq sivikitsuinnaq atorlugu paasivarput ajunngitsumut ingerlalluta. Iluaqaaq, Kent naggasiivoq.
