Nukissiorfiit meeqqat atuarfiat brinti pillugu filmimik nutaamik tapersersorpaa

Marlunngorneq oktobarip 28-ani Nukissiornermut pisortap Svend Hardenberg-ip filmi nutaaq ”Brint – Siunissami nukissiuutissaq” 1000-inngorlugu Atuarfimmut atuakkanik saqqummersitsisarfik Ilinniusiorfiup pisortaanut Abia Abelsen-imut tunniuppai. ”Brint – Siunissami nukissiuutissaq” tassaavoq filmeeraq aalasuliaq kalaallisut dansk-isullu oqaasertalersugaq, 11 minutsinik aammalu 9 minutsinik sivisussuseqartoq.

- Erngup nukinga atorlugu nukissiorneq, brinti, brændselscellet aammalu sarfamik pilersitsisarneq,  ajornaatsumik kusanartumillu ”Brint – Siunissami nukissiuutissaq” paasiuminarsaavoq, taama oqarpoq Svend Hardenberg.
 
- Aammattaaq brinti pillugu filmi Namminersornerullutik Oqartussat nukissiornikkut piujuartinneqarsinnaasut pillugit qanoq pitsaanerusumik atorluaasoqarsinnaaneranik annertunerusumik oqallittoqalernissaanik kissaateqarnerat eqqorluarpaa, taama ilassuteqarpoq Attaveqarnermut, Avatangiisinut Aatsitassanullu Naalakkersuisoq, Kim Kielsen.

Filmip takutippaa qanoq brint imermit nukinillu piujuartinneqarsinnaasunit pilersinneqartartoq. Aamma takutippaa qanoq ililluni brintimik katersisoqarsinnaaneranik periarfissaqarnersoq, brændselscelle qanoq ittuusoq kiisalu teknologip kemia qanorpiaq ittuunera. Suliaavoq meeqqat atuarfianni atuartitsinermi atugassianngorlugu. Ilutigalugu atuagaq ”Nukik – Atuartuni Akullerni atuagassaq”  oqaatsit marluk atorlugit nukissiornermut tunngasoq saqqummersinneqarpoq.

Filmi aalasuliaq, Nukissiorfiit ataqatigiissaarinermut akisussaasuulluni, savalimmiuniit Jarfeingi, Ilinniusiorfik aammalu Nukissiorfiit suleqatigiinnerisigut pinngortinneqarpoq. Suliniut Namminersornerullutik Oqartussanit aningaasaliiffigineqarpoq, brintilu pillugu suleqatigiiffimmit NAHA-mit (North Atlantic Hydrogen Association) aallaaveqarluni. Suleqatigiinneq pilersinneqarpoq Nukissiorfiit qaaqqusisuulluni Nuummi aggust 2006-mi aallarniutaasumik ataatsimeersuarneqarmat.

Filmi meeqqat atuarfianni atuartitsinermi atorneqarsinnaasoq, aamma sineriammi atuagaateqarfinni tamani atorniarneqarsinnaassaaq - ilinniarnertuunngorniarfinnullu, HTX-imut tekniskskole-nullu nassiunneqassalluni.