Napasumi innaallagissiorfiup iluarsaannera

Maniitsup eqqaani Napasumi innaallagissiorfik juunip qaammataani iluarsaanneqarpoq naammassingajalerlunilu.

Nunaqarfiup innaallagissiorfia finskit motooriliorfiannit AGCO SISU POWER-imit nutaamik motoorilerneqarsimavoq. Taakku motooritoqqat ukiuni qulingajanni atorsimasut taarserpaat. Pisariaqartitsineq aallaavigalugu iluarsaasoqarpoq.
   - Pilersaarut naammassivitsinnagu motoorinut pingasuusunut tamanut ikuallattooratarsinnaanermut initaliisoqassaaq matulinnik natermilu kabeleqarfitoqqat tamarmik qalleqqinneqassallutik, pilersaarusiornermut aqutsisoq Lasse B. Mousten oqarpoq. Ikuallattooratarsinnaanermut ini tassaavoq ini ikuallattoqalersinnaanerani allanut siaruarfissaqanngitsoq, taamaalilluni nunaqarfimmut pilersuineq qaqugukkulluunniit nangeqqinneqaannarsinnaalluni.

Nunaqarfiup imeqarfianik iluarsaaneq aallartereerpoq ukioq mannalu naammassissangatinneqarluni.

Assiliisoq: Lasse B. Mousten