28. juli 2010
Maniitsoq nutaamik innaallagissiorfimmik kiassaateqarfiutigisumik peqalissaaq 2011-mi ukiakkut piareersimasussamik. Taassuma innaallagissiorfitoqaq taarsissavaa.
Innaallagissiorfiup motoorii nutaanngilisimapput nutaanillu taarserneqassallutik. Taamaattumik Nukissiorfiit innaallagissiorfimmik kiassaateqarfiutigisumik nutaarluinnarmik sanaartuleruttorpoq, tassa innaallagissiorfik aamma saniatigut ungasianit kiassaanermut kiassaasuusumik.
Qaarsumik qaartiterineq maajip qaammataani aallartinneqarpoq, tassani toqqaviliortoqassalluni kiisalu erngup aqqutaa, kabelit ungasianiillu kiassaanermut aqqutit inissinneqassallutik. Innaallagissiorfiup kiassaateqarfiutigisup inissisimaffigissavaa kommunip ikuallaaviata eqqaa illoqarfiup avataaniippoq.
– Innuttaasut qaartiterinermit sanaartornermiillu akornusersorneqangaarnavianngillat, pilersaarsusiornermut aqutsisoq Lasse B. Mousten oqarpoq. Innaallagissiorfiup kiassaateqarfiutigisup matuneqarnissaa decembarimut pilersaarutaavoq, taamaalilluni ukiuunerani silataani sulisoqannginniassammat.
- Innaallagissiorfik kiassaateqarfiutigisoq Paamiuni innaallagissiorfittaamut kiassaateqarfiutigisumut assingussaaq. Teknikikkut asseqqissaarissavaa, Lasse oqaluttuarpoq.
Innaallagissiorfik kiassaateqarfiutigisoq assigiissaagaq, akikitsoq sunniuteqarluartorlu siunissami nunatsinni maani innaallagissiorfinnik kiassaateqarfiutigisunik sanasoqassatillugu aallaavittut atorneqarsinnaasoq pineqarpoq.
- Paamiuni innaallagissiorfimmut sanilliullugu innaallagissiorfissaq kiassaateqarfiutigisoq ineriartorteqqinneqalaarsimavoq, taamaallaalli atortussanik toqqaanikkut soorlu natilersornerani silatilersorneranilu.
Sulisut katersuuffissaat
Illutaa 531 m2-iussaaq maskiinaqarfeqassalluni teknikimut regulatorimullu initalimmik, nakkutilliivilimmik, allaffilimmik, kantiinalimmik, perusuersartarfilimmik, uffarfilimmik atisanillu taarsersuisarfilimmik. Kantiinami Maniitsumi Nukissiorfimmi sulisut illoqarfimmi sumiiffinni assigiinngitsuni sulisuusut katersuussinnaapput.
Ungasianit kiassaanermut aqqutit annertusarneqarput
Maniitsumi ungasianit kiassarneqartut amerlammata innaallagissiorfittaassami innaallagissiornermit kissaq tamakkiisumik atorneqassaaq.
- Ungasianit kiassaanermut aqqutit aamma pilersaarutit naapertorlugit 2011-mi 2012-imilu annertusarneqassapput tamatumalu kingorna atuisartut amerlanerusut ungasianit kiassarneqarnissamik neqeroorfigineqarsinnaalissallutik, Lasse naggasiivoq.
Asseq: Lasse B. Mousten
