21. december 2010
2010-mi Narsami, Qaqortumi, Nanortalimmi, Paamiuni Ittoqqortoormiinilu taakkulu nunaqarfiini sullitat innaallagiamik atuinermut uuttortaatitoqaat uuttortaatinik ungasianit atuarneqarsinnaasunik nutaanik taarsersorneqarput. Pilersaarusiornermut aqutsisoq Kent Skildal ukiormanna suliat pillugit oqaluttualaarpoq:
Suleqatit angalanerillu pitsaasut
- Angalanerit ukioq manna pitsaasimapput, kiisalu Nukissiorfiit immikkoortortaqarfiinit ikiuulluartoqarlunilu soqutiginnittoqarluarsimavoq, Kent ungasianit atuarneqarsinnaasunik uuttortaatilerisut arfinillit allat peqatigalugit kujataani tunumullu angalasimasoq oqarpoq.
- Illoqarfimmut nunaqarfimmulluunniit pigaangatta piffimmi ilisimasanik atorfissaqartitsiuaannarpugut tamatumanilu sumiiffimmi suleqatitta ilisimasaat iluaqutigisarpavut, ikiuunnerlu tamanna pinngitsoorusunngeqaarput qutsatigingaarlugulu.
- Arlaleriarluta sullitat uuttortaataasa taarseriartorneranni sulinerat nalaartarparput. Tamatumani sumiiffimmi suleqatitta sullitat pineqartut sumi sulisarnersut, imaluunniit pineqartup sumi matuersaateqartoqarneranik ilisimannittumik ilisarisimasalimmik illooraqarnera ilisimakkajuttarpaat taamaalillutalu uuttortaammik taarsiiaartorsinnaasarpugut, Kent oqarpoq illalaarlunilu.
- Suleqatigiitsialaapput tamarmillu sivitsulersumi tamaaneereerput. Suliamik sungiussisimanermut suliallu pitsaassusaanut pitsaavoq.
Taarsersuineq
- Innaallagiamik atuinermut uuttortaatit agguaqatigiissillugit 45-t ullormut taarsertarpavut, sapaatit akunnerannut ullut arfinillit, ullormut 10 tiimit sulisarluta.
- Imermik kiassaanermillu atuinermut uuttortaatinik taarsersuineq Nukissiorfiit immikkoortortaqarfiinit isumagineqarput taamaammat taakku taarsersuinermi iserfigivallaanngilavut.
- Aatsaat innaallagiamik, imermik kiassaanermillu atuinermut uuttortaatit tamarmik taarsersorneqareerpata pitsanngorsaasoqarlunilu nassiussuinermut tunngasut pitsaassutsikkut qularnaarneqassapput, Kent ilassusiivoq. Tamanna pissaaq illoqarfimmi nunaqarfimmiluunniit uuttortaatit 0-inngortinnerisigut tamatumalu kingorna uuttortaatit attavilersorneqalissallutik. Taava takuneqarsinnaalissaaq uuttortaatit sorliit kissaatigisatut paasissutissanik nassiussuinnginnersut taakkulu misissussavavut. Imaassinnaavoq signalia sakkortusarniarlugu antenneliisoqartariaqartoq imaluunniit allatut iliortoqartariaqartoq, Kent oqaluttuarpoq.
- Illoqarfimmit nunaqarfimmiilluunniit aallartinnata suut tamarmik tamakkiilluinnartumik atuarneqarsinnaajuartariaqarput.
Ornitassaq tulleq
Aappaagu 2011-mi illoqarfiit Maniitsoq, Qasigiannguit, Aasiaat Kangaatsiarlu taakkulu nunaqarfii, kiisalu Qeqertarsuarmi Ilulissanilu nunaqarfiini uuttortaatit taarsersorneqassapput.
- Ukiortaareerpat Maniitsuliassaagut, tassaniissalluta martsip qiteqqunnissaata tungaanut. Tassani imermik kiassaanermillu atuinermut uuttortaatit saniatigut innaallagiamik atuinermut uuttortaatit 1.600-t missaanniittut taarsersorneqassapput, taama Kent naggasiivoq, taassumallu pilersaarusiornerit tamaasa soorlu pisiassat, angalaneq, ineqarniarneq aammalu aningaasaqarniarneq suliamut tunngasut isumagisarpai.
Innaallagiamik, imermik kiassaanermillu atuinermut uuttortaatit katillugit 75 %-it missaanniittut taarserneqareerput. Uuttortaatinik taarsersuinertaata 2012-imi naammassisimanissaa naatsorsuutigineqarpoq pilersaarullu 2013-imi septembarip naanerani tamakkiisumik ingerlalersimassangatinneqarluni.
Suliaq pillugu uani paasisaqarnerugit
Atuinerit uani misissoruk
