22. marts 2010
Kalaallit Nunaanni brintiliorfiit siullersaat ullumi ataasinngornermi 22. marts 2010-mi pisortatigoortumik aaqqissuussinikkut atoqqaartinneqarpoq. Sanaartugaq misileraataavoq brintip siunissami nunatsinni qanoq atorneqarsinnaanera pillugu apeqqummut akissutaasussaq.
Andreas Anuik Hardenberg pingasunik ukiulik Kalaallit Nunaanni brintiliorfiit siullersaata atoqqaartinneqarnerani matuersaammik ikkussisuuvoq, ilaatigut Namminersorlutik Oqartussaneersut najuuffigisaannik. Nunami nukissiorfik Nukissiorfiit sanaartukkamik angallanneqarsinnaasumik pisisimavoq, maannalu taanna Nuummi qullersaqarfiup silataani inissisimavoq. Sanaartugaq H2 Logic A/S-imit Danmarkimeersumit pissarsiarineqarpoq.
Misileraavimmik siunertaavoq brintimik nukissiuutitut tunisassiornermik, angallassinermik atuinermillu misilittagaqalernissaq, taamatullu Nukissiorfiit tunisassiorneranni nukissap ataavartup annertusarnissaanut brintimik atuinissamut periarfissanik misissuinissaq.
Naammassisinnaasanik atorluaaneruneq
- Ukiup ilarujussuani erngup nukinganik innaallagissiorfimmi maani Nuummi pilersuisorisatsinni naammassisinnaasat atorluarneqarneq ajorput. Isumaavoq naammassisinnaasat taakku imermik misileraammut tassunga brintinngortitsinermut iltinngortitsinermullu atorneqarnissaat, nukissiorfiup pisortaa Svend Hardenberg oqalugiarnermini oqarpoq.
- Piffissani nukissamik atuineruffiusuni, ukiukkuunerusartumi brint ikummatissaasivimmi innaallagianngorteqqinneqassaaq kissanngorteqqinneqarlunilu. Tassa brint batteriitupajaaq atorneqassaaq, pisariaqartitsineq naapertorlugu atugassatut nukissamik toqqorterivittut.
Sanaartugaq aamma takutitsissutitut atuutissaaq, innuttaasut brintimik ikummatissanillu ilisimasaat annertusarniarlugu. Taamaattumik sanaartukkap silatai planchersuarnik sanaartukkap sannaanik atuunneranillu allassimaffiusunik ikkussuiffigineqarpoq.
Brintiliorfik tapersersorneqarpoq
Aammattaaq Ineqarnermut, Attaveqarnermut Angallannermullu Naalakkersuisoq Jens B. Frederiksen atoqqaartitsinermut peqataavoq ilaatigut oqalugiarnermini ima oqarpoq:
- Ikummatissanik nunap iluaneersunik pinngitsuuisinnaannginnermi siunissamut ungasissumut, assersuutigalugu nukissiuutini ataavartuni, soorlu erngup, anorip seqernullu nukinganut kiisalu brintimut teknologiimut, ilisimasanik katersinermut aammalu ineriartortitsinissamut periarfissanut nutaanut upperisaqarnermut aningaasaliinissaq pisariaqarpoq. 2006-imili Namminersorlutik Oqartussat nukissiuutinik ataavartunik ilisimatusarnermut ineriartortitsinermullu aningaasaliissutissanik aningaasanut inatsimmi immikkoortitsisarsimapput. Suliniummi tassani brintiliorfiliornissaq tapersersorneqarsimavoq, siunissamilu nunami issittumi innaallagissamik pilersuineq aallunneqartussaavoq.
Ullumikkut inissisimaneq
Nukissap – innaallagiaq kissarlu – Nukissiorfiit nuna tamakkerlugu tunisassiarisaata 60 %-iata missaaniittoq ullumikkut erngup nukinganeersuuvoq. Sinneruttoq dieselimik akisuumik mingutsitsisumillu atuinikkut pilersinneqartarpoq. Pingaartumik illoqarfinni nunaqarfinnilu minnerusuni diesel pinngitsoorneqarsinnaanngilaq, taakku amerlanerpaat erngup nukinganik innaallagissiorfiliornissamut allatulluunniit ataavartumik annerusumik nukissiuusersornissamut periarfissaqanngimmata. Tamatuma saniatigut dieselimik ingerlasumik nukissiorneq illoqarfinni ullumikkut erngup nukinganik innaallagissiorfinnit pilersorneqartuni sillimmatitut atorneqarpoq.
Siunissami periarfissat
Erngup nukinganik innaallagissiorfeqarnermi tunisassiarisinnaasanik annertusaajuarnikkut kiisalu brintiisiveqarnermik ikummatissaasiveqarnermillu atuiniarnikkut ungasinnerusoq eqqarsaatigalugu Nukissiorfiit innaallagiamik kissamillu tunisassiornermut dieselimik atuiunnaavissinnaassapput. Taamatuttaaq brinti angallassinermi ikummatissatut atorneqarsinnaassaaq erngullu nukinganik atuinermi periarfissarpassuaqarnikkut brintimik avammut tunioraaneq siunissami periarfissaalersinnaavoq.
Sanaartugaq
Misileraat innaallagiamik erngup brintinngortinneqarneranut iltinngortinneqarneranullu atuisuuvoq. Tamatuma kingorna brinti toqqorneqartarpoq pisariaqalersillugu ikummatissaasivimmi innaallagianngorteqqinneqarlunilu kissanngorteqqinneqarsinnaalluni. Brintiliorfimmit ikummatissaasivimmiillu kissaq sinneruttoq kiassaanermut atorneqarsinnaavoq innaallagiaq innaallagiap aqqutaatigut nassiussuunneqarsinnaalluni Nukissiorfiilluunniit allaffeqarfianni atorneqarsinnaalluni.
Brintiliornermut atatillugu brintimut naqitsivik siammarterivillu atorlugu brinti puiaasanut katersorlugulu naqinneqarsinnaavoq. Taama iliornikkut illoqarfinnut nunaqarfinnullu angallanneqarsinnaavoq taakkunanilu innaallagialersuinermut kiassaanermullu atorneqarsinnaalluni. Sanaartugaq aamma immiivissamik ilaneqartussatut piareersimatinneqarpoq, brinti angallannermut ikummatissatut atorneqarsinnaasunngorlugu.
Tulliuttoq
Suliassami immikkoortut tullii pilersaarusiorneqalereerput. Isumassarsiat ilagaat sanaartukkamit brintimik nunqarfinnut qanittorisanut siammarterinissaq imaluunniit sanaartukkap nuunneqarsinnaasutut ilusilersugaasup pisariaqartitsineq naapertorlugu tamanut tamaanga nuuinneqarnissaa.
