Juullimi innaallagissamik atuineruneq

Nuummi angerlarsimaffinni juullimi 2008 innaallagissamik atuineq ulluinnarni atuinermiit 30 %-imik annertuneruvoq. Kisitsit ukiutoqqamut tunngasoq 20 %-iuvoq.

Periaaseq nutaaq, uuttuutinik ungasianiit nalunaarsuineq, atorlugu atuisut ataasiakkaat atuinerat 15 minutsikkaartumik ingerlaavartumik nalunaarsorneqarsinnaalerpoq. Nukissiorfinni innaallagissamut, imermut kiassarnermullu uuttuutit nunatsinni tamarmiittut taarsersoruttulerpavut ungasianiit nalunaarsortakkanik taarserlugit suliarlu tamanna 2014-mi naammassineqassasoq naatsorsuutigaarput.

Uuttuutit ungasianiit nalunaarsortakkat atuisutsinnut pitsaanerusumik sullissinermik kinguneqarnissaat naatsorsuutigaarput. Taarsiineq ingerlanneqareersorlu atuineq eqqortoq naapertorlugu akiliisitsisoqartalissaaq. A’contomik akiliisitsisarneq taamaatinneqassaaq. Taamaalilluni sipaarniutit kinguneri erngerluni takuneqarsinnaalissapput, siunissamilu atuinerup nakkutiginerulernissaanut, Nukissiorfiit nittartagaa aqqutigalugu imaluunniit akiligassat annertussusaat naapertorlugu, periarfissaqalerluni.

Ukiup 2008-p naalernerani Nuummi nunaqarfiinilu innaallagissamut uuttuutit tamakkerlutik taarserneqarsimalerput. Nuannariinnarlugu radiukkut nassitsissuteeraq aqqutigalugu uuttuutit nalunaarsorneqarneri sammilaarsimavarput, juullimilu atuineq misissorlutigu. Inuinnaat atuinerat tamakkiisoq misissoraanni takuneqarsinnaalerpoq, juullimi ukiutoqqamilu annertunerusumik atuisoqarsimasoq.

Juulliaqqap unnukkuani agguaqatigiissillugu 30 %-imit minnerunngitsumik atuinerusoqarsimavoq, ulluinnarni atuinermut sanilliullugu. Ulloq unnuarlu innaallagissamik qanoq atuiffiutiginersoq misissoraanni ersarissumik takuneqarsinnaavoq nalunaaquttap 17 – 18 akornanni atuisoqarnerusoqartartoq. Tassalu piffissami amerlanertigut tassani juullimi nerisassat sassaalliutigineqalernerini. Taamaattorli ullup qeqqata siorna nalunaaqutaq quliniit atuineq qaffariartulersarpoq.

Kisitsisit misissornerini aamma takuneqarsinnaavoq juullip ukiortaallu akornanni sapaatip akunnerata naanerani innaallagissamik atuineq sapaatip akunnerata naaneranit nalinginnaasumit atuinikinneruffiusoq. Immaqaana tassani igaffimmiit erruivimmiillu imminut qasuersartilaartoqartarsimasoq, juullilernerani ulapereernerup kingorna?

Februar 2009 uuttuutinik taarsersuisut avannamut aallassapput Sisimiunut, tassani uuttuutitoqqat nutaanik ungasianiit nalunaarsortakkanik taarserneqarlutik. Aggustusimiit Upernavimmi Uummannamilu nunaqarfittaannilu atuisut uuttuutaat taarsersorneqassapput.